HOME-ACCUEIL - ENGLISH - FRANCAIS - KINYARWANDA

Bwana Zapatero, Ministri w’Intebe wa Espagne yanze kubonana na Perezida Kagame. We na Kagame bagombaga kuyoboranira hamwe inama ya ONU ku nshingano z’amajyambere Umuryango w’Abibumbye wihaye ziswe iza kino kinyagihumbi.

Bwana Zapatero iyo nama ntiyayigiyemo ahubwo yahisemo kwoherereza Ministri we w’Ububanyi n’Amahanga kumuhagararira.

Ibyo yabitewe n’uko abanyapolitiki ndetse n’imiryango iharanira uburenganzira bw’ikiremwa muntu bakemanze cyane ukuza kwa Perezida Kagame muri Espagne. Bose babona akwiye guhabwa akato, ndetse akaba yashyikirizwa ubucamanza.

Muri 2008, ubucamanza bwo muri Espagne bwasohoye impapuro mpuzamahanga zisaba guhagarika abasirikare bo hejuru 40 bo mu ngabo z’u Rwanda bakekwaho kuba barakoze ibyaha byibasira inyoko muntu bayobowe na Perezida Kagame. iyo dosiye iracyahari kandi imiryango iharanira uburenganzira bw’ikiremwa muntu irizera ko akari cyera bazafatwa bagashyikirizwa ubucamanza.

Ishami ry’umuryango w’abibumbye ryita ku mpunzi, HCR, riramagana itahurwa ku ngufu ry’impunzi z’abanyarwanda zari muri Uganda zibarirwa ku 1700. Muri zo hari izapfuye n’izakomeretse muri uwo mukwabu ugayitse w’abapolisi.

HCR iratangaza ko izo mpunzi zari mu nkambi ebyiri zashutswe ngo zize gufata imfashanyo n’ibyangombwa mbere yo kwinjizwa ku ngufu mu makamyo y’abapolisi.

Abanyarwanda batatatinyijwe muri icyo gikorwa bavuga ko abapolisi barashe abageragezaga kwiruka kandi ko abantu babiri bapfuye igihe batarukaga bava muri ayo makamyo.

Leta ya Uganda ivuga ko abo bantu atari impunzi nyazo ahubwo ko ari abimukira bazanywe no kwishakira imibereho myiza.

HCR ivuga ko bamwe mu bacyuwe bari bafite ibyangombwa by’impunzi.

Ikindi kandi HCR yari isanzwe izi imigambi y’abategetsi b’u Rwanda na Uganda ariko ntacyo yakoze kugira ngo iyamagane batarabikora.

Sibwo bwa mbere HCR yemera gushyira impunzi z’abanyarwanda mu maboko y’ubutegetsi zahunze maze zigacyurwa ari ingaruzwamuheto.

Akari cyera HCR kimwe na leta zombi za Uganda n’u Rwanda igomba kuzabazwa ibizaba byose ku batahuwe kuri ubwo buryo, ndetse n’indishyi ku bishwe cyangwa abamugajwe mu gihe ry’iryo tahurwa rinyuranye n’amategeko mpuzamahanga.