Video: Ijambo Victoire Ingabire yagejeje ku Banyarwanda ku sabukuru ya 49 ya Kamarampaka – 25 Nzeli 2010
U Rwanda Ruzubakwa n'Amaboko y'Abana Barwo Bose

Video: Ijambo Victoire Ingabire yagejeje ku Banyarwanda ku sabukuru ya 49 ya Kamarampaka – 25 Nzeli 2010

[youtube]Um5S5zgIRcQ[/youtube]

Banyarwandakazi,
Banyarwanda,

Mu mateka y’igihugu cyacu, Abanyarwanda bigeze kugira uburenganzira busesuye bwo guhitamo ubuyobozi bishakiye babona buboneye igihugu cyacu. Hashize imyaka 49 mu Rwanda habaye itora bise KAMARAMPAKA. Icyo gihe Abanyarwanda bagombaga gukemura impaka niba baguma ku ngoma ya cyami cyangwa niba bafata inzira ya Repubulika. Uyu munsi ndagira ngo tuzirikane abakurambere bacu baharaniye ko u Rwanda ruba igihugu kigendera ku mategeko, Abaturarwanda bose bakareshya imbere y’amategeko, Abanyarwanda bakabaho mu bwisanzure busesuye. Kugira ngo umunsi wa Kamarampaka twibuka uyu munsi ushobore kubaho, habayeho ubwitange n’ibitambo, gukunda igihugu mbere ya byose byaranze izo Ntwari zaharaniye ko Abanyarwanda bagira uruhare mu kwihitiramo inzego z’ubuyobozi zibereye igihugu cyacu.

Nyuma y’imyaka 49 biragaraga ko ibyo byiza abakurambere bacu baharaniye biriho bizima. Repubulika baharaniye na demoukarasi bisigaye ku mazina gusa. Mu bikorwa biracika. Akarengane, ingoyi, ubwoba nibyo byahawe intebe.

Ubutegetsi buriho bwa FPR-Inkotanyi ntibwemerera Abaturarwanda ukwishyira ukizana mu gihugu cyabo. Kunenga ibitagenda mu miyoborere y’igihugu byitwa kuba umwanzi w’igihugu. Kwamagana akarengane gakorerwa Abanyarwanda hirya no hino bikitwa kugira ingengabitekerezo ya jenoside; guharanira ubutabera busesuye, butavangura, bwunga Abanyarwanda aho gushyira bamwe hejuru y’abandi bikitwa kubiba amacakubiri.

Banyarwandakazi, Banyarwanda politiki nk’iyo y’igitugu ntabwo ishobora gukomeza mu gihugu cyacu maze ngo tuvuge ko dutegurira ejo hazaza heza abana bacu n’urubyiruko ruriho rubyiruka.

Uyu munsi wa Kamparampaka ubaye nyuma y’amatora afifitse ya perezida wa Repubulika yaranzwemo igitugu no kuvutsa Abanyarwanda ubwisanzure bwo kwihitiramo ubayobora. Uyu munsi kandi na none ubaye nyuma y’itangazwa rya rapport y’urwego rwa l’ONU ruharanira uburenganzira bw’ikiremwamuntu igaragaza ibyaha bikomeye by’ubwicanyi byakorewe impunzi z’Abanyarwanda muri Congo ndetse ubwo bwicanyi bugahitana n’abanyekongo. Ibyo bikorwa byose ntibitesha isura ababikora gusa ahubwo biyitesha igihugu cyose, biyitesha Abanyarwanda twese.

Repubulika abakurambere bacu baharaniye igomba kuba Repubulika irangwa na demokarasi, igomba kuba Repubulika yubahiriza uburenganzira bw’ikiremwamuntu, igomba kuba Repubulika iha Abanyarwanda bose amahirwe angana, igomba kuba Repubulika iharanira ubutabera busesuye, Abanyarwanda twese tukareshya imbere y’amategeko. Igomba kuba Repubulika iha Abanyarwanda bose uburenganzira bumwe mu guharanira imibereho myiza ya buri wese.

Ngibyo bimwe mu byiza dukomeje kwitangira guharanira mu gihugu cyacu, nkaba nongeye kubahagamarira mwese aho muri, Banyarwandakazi, Banyarwanda, guhagurukira rimwe, tukwubaka igihugu cyacu mu bw’ubwubahane n, uburenganzira busesuye kuri twese ntawe usigaye inyuma.

Harakabaho Repubulika yu Rwanda,
Harakabaho Abanyarwanda,

Twese IMANA iduhe umugisha.

Umuyobozi w’ishyaka FDU INKINGI
Victoire INGABIRE UMUHOZA

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Comments

  1. fidel says:

    Abahungu baracyubaka umusubizo nawe uracyarindagira muri za Kamarampaka!!Kamarampaka se iyo ukangisha siyo ntandaro ya jenoside ko utavuga se abatutsi bishwe icyo gihe nuko bo batari abantu!Abo barwanashyaka se uvuga baharaniye,uwishwe ninde,Niyo mpamvu watungukiye ku gisozi,ugahita ubaza aho abahutu bahambwe,ese uwakubaza aho ba Mbonyumutwa na ba Kayibanda bahambye abatutsi icyo gihe ngo baharaniraga ubwigenge waherekana?Ariko ndakurenganya wari utaravuka naho uvukiye uvukira muri maternite witaweho abo mwavukiye rimwe b’abatutsi babatsindaga mu bitaro ngo nta mututsi ukwiye kubaho!!None urarindagira usakuza gusa ukagirango abo ubwira abenshi ntitukurusha kumenya iyo kamarampaka uko yaje!Have widutesha igihe twiyubakire igihugu ujye gusakuriza hirya cyangwa bakumanure 1930 abe ariho ujya gusakuriza.

  2. Kagabo says:

    Ntawe utakwishimira iyo nzira abo bakurambere bari bahisemo nyuma y’imyaka amagana n’amagana yo gutsikamirwa!!!!Kamarampaka ntawayibagirwa kuko nicyo gikorwa abanyarwanda bose bibonyemo maze ijwi rya buri wese rimuha ijambo!!!!!!
    Madame komereza aho!!! Imana yakuduhaye turayishyima!! Ingoyi itugeze kure rwose nimutabare!!!!

  3. Jhon says:

    Ese Ma! Uracyari mu bipfuye bya kera? Yoo! Nturamenya politiki wa kinira mu Rwanda? Ubu dukeneye amahoro, ntuyatubuze kandi reka twikomereze na ”Vision 2020” Ubu se, amaso ntaguha? Icyerekezo u Rwanda rufite kandi kibereye abarutuye, ntaho bihuriye n’ibyo urimo.

  4. Alan Nkusi says:

    Urakoze kutwibutsa aho twavuye , Mme Ingabire.
    Definitely , aba bakwamagana bari kwiyibagiza ko na sebuja wabo PK yahereye kuri iki gikorwa yangira umwami wabo gutaha !
    Hanyuma kandi bagasubira inyuma bagasingiza izo 2020 , mu gihugu kiri muri 25 byambere ku isi byugarijwe n’ inzara !
    Tukuri inyuma .

  5. janne says:

    Mwese muri bamwe, si abahutu si abatutsi mwese mwarishe, ahubwo mwari mukwiye kubabarirana mukibagirwa ibyo byose byatambutse hakabaho kwiyunga no gukundana kuko u Rwanda ni urwa abanyarwanda si urw’umututsi cyangwa umuhutu. Hari hakwiye kuboneka umutegetsi udafite aho abangamiye. abanyarwanda bageze aho bari bakwiye kwisubiraho bakibagirwa ibyabaye baka movinga on naho ubundi bizahora ari urujya nuruza.

Speak Your Mind

*