Umuyobozi wa PS-Imberakuri Me Bernard Ntaganda yitabye urukiko rwa Kigali
U Rwanda Ruzubakwa n'Amaboko y'Abana Barwo Bose

Umuyobozi wa PS-Imberakuri Me Bernard Ntaganda yitabye urukiko rwa Kigali

Kuri uyu wa Gatanu tariki ya 07 Mutarama 2011, Umuyobozi w’ishyaka rya PS-Imberakuri Me Bernard Ntaganda yitabye urukiko. Nta mwunganizi yari afite kuko nawe asanzwe ari umunyamategeko wunganira abandi.

Me Bernard Ntaganda mu rukiko

Me Ntaganda arashinjwa ibyaha byo kuvutsa igihugu umudendezo, gukurura amacakubiri, ndetse n’ubufatanyacyaha mu gutegura kwigaragambya nta burenganzira. Kuri iki cyaha cyo guteganya kwigaragambya nta burenganzira, Me Ntaganda arareganwa n’abandi bane bo mu mashyaka PS-Imberakuri, Green Party na FDU-Inkingi.

Kuvutsa igihugu umudendezo

Ku cyaha cyo kuvutsa igihugu umudendezo, Umushinjacyaha Alain Mukurarinda yavuze ko Me Ntaganda yagiye akoresha imvugo zashoboraga kuvutsa igihugu umudendezo. Muri izo mvugo harimo kuba yaravuze ko atemera uburyo gahunda ya Umurenge SACCO ikora, ko “abize mu gifaransa basigaye bafatwa nk’abize mu kibeho”, ko inkiko Gacaca zirimo abahezanguni no kuba yarabwiye ubutegetsi buhari ngo “tura tugabane niwanga bimeneke”.

Ku birebana n’imikorere y’Umurenge SACCO, Me Ntaganda yashimangiye ko koko atemera uburyo abaturage bahatirwa ku ngufu kujya muri Umurenge SACCO, kuko ahenshi usanga badahabwa uburenganzira bwo kwihitiramo aho bagomba kubitsa.

Ku birebana no gutoteza abavuga igifaransa, Me Ntaganda yavuze ko anenga uburyo igifaransa cyakuweho hutihuti. Yavuze ko n’ubwo babeshya igifaransa kiri mu ndimi eshatu zemewe mu Rwanda, no ku ndangamuntu ntikikirangwaho. Urundi rugero yatanze ni uko Umuyobozi wa Kaminuza Nkuru y’ U Rwanda yatangaje ko nta mwarimu utazi icyongereza uzongera kwigisha muri iyo Kaminuza.

Ku birebana na Gacaca, Ntaganda yemeye ko hari byinshi koko binengwa ku mikorere ya Gacaca. Yatanze ingero z’amashyirahamwe yashinjaga abantu mu Nkiko Gacaca, “inyangamugayo” za Gacaca zacaga imanza zibera ndetse n’abangaga kuvuga ukuri mu nkiko Gacaca. Yatanze ingero z’amashyirahamwe yashyiriweho kuzinzika ukuri no gupyinagaza abantu bakoresheje Gacaca.

Ku mvugo ye ngo “Tura tugabane niwanga bimeneke”, Me Ntaganda yisobanuye avuga ko yashakaga kuvuga ishyaka FPR ritashakaga ko PS-Imberakuri ihagararirwa muri Komisiyo y’amatora. Ngo we nk’umunyapolitiki yifuzaga ko ishyaka rye ryagira urihagararira muri komisiyo y’amatora, naho ibyari kumeneka asobanura ko yashoboraga gusaba imiyango mpuzamahanga guhagarika inkunga bagenera amatora.

Ifatwa rya NtagandaTwabibutsa ko Me Bernard Ntaganda yafashwe kare mu gitondo tariki 24 Kamena 2010, umunsi yari yateganije kuyobora imyigaragamyo y’abayoboke ba PS-Imberakuri basaba ko iryo shyaka ryagira abarihagararira muri Komisiyo y’Amatora. Icyo gihe polisi, aho kuvuga ko imufashe kugira ngo iburizemo iyo myigaragambyo, yatangaje ko yamufashe kubera ko akekwaho kubiba amacakubiri no kuba afite uruhare mu gikorwa cy’ubwicanyi ngo cyari kigiye gukorerwa Christine Mukabunani, wari uyoboye ishami ryicomokoye ku buyobozi busanzwe bwa PS-Imberakuri.

Kubiba amacakubiri.

Ku cyaha cyo kubiba amacakubiri, Me Ntaganda ashinjwa imvugo ngo “Leta ni iya bamwe si iy’ ubumwe”. Me Ntaganda yemeye ko yabivuze koko kandi ko ari ukuri, yiregura atanga urugero rw’ishyaka rye ryajujubijwe kandi ryaragombaga kugira uruhare ndetse n’umwanya muri guverinoma. Yemeza ko ibyababayeho bigaragaza rwose ko leta itari iy’ubumwe ahubwo ari iya bamwe. Me Ntaganda yakomeje guhamya ko ariwe Perezida w’ ishyaka PS-Imberakuri kandi ko nta gushidikanya ishyaka rye rigamije kubona ubutegetsi. Yagize ati: ”Nk’ uko nabivuze ndongera mbisubiremo, PS-Imberakuri si ishyirahamwe rihinga amateke, dushaka ubutegetsi.”

Yakomeje avuga ko kumushinja ingengabitekerezo ari nko gushakira amata ku matako y’injangwe…

Gutegura imyigaragambyo

Ku cyaha cyo gutegura imyigaragambyo mu buryo butemewe n’ amategeko, Me Ntaganda avuga ko yafashe icyemezo cyo gukora imyigaragambyo ariko agafatwa atarayiyobora. Ibyo byabaye nyuma yo kwandikira Akarere ka Gasabo hagashira iminsi itandatu atarabona igisubizo. Ubushinjacyaha buvuga ko yandikiwe abuzwa gukora imyigaragambyo, mu gihe Ntaganda we ahamya ko iyo baruwa imubuza atigeze ayibona.

Umwanzuro w’ubushinjacyaha

Mu myanzuro yabwo, Umushinjacyaha yasabye ko, kuri ibyo byaha byose aregwa, Me Bernard Ntaganda yahanishwa igifungo cy’imyaka icumi n’amezi abiri n’ihazabu y’ibihumbi magana ane.

Urubanza rwasubitswe

Kubera ko bwije Me Ntaganda atararangiza kwiregura, urukiko rwemeje ko urubanza ruzasubukurwa kuwa gatanu tariki ya 14 Mutarama, akaba ari nabwo kandi hazaburanishwa abandi bane baregwa icyaha kimwe na Ntaganda cyo gutegura imyigaragambyo itemewe.

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Comments

  1. Gashuhe says:

    ntabwo ntaganda ary’iminwa rwose

Trackbacks

  1. […] by Chief Editor Urukiko rukuru rw’U Rwanda rwashoje iburanisha ry’urubanza rw’umukuru w’ishyaka PS Imberakuri Bwana Bernard Ntaganda hamwe n’abandi bayoboke 4 b’amashyaka atavuga rumwe n’ubutegetsi. Indi nyandiko: Umuyobozi wa PS-Imberakuri Me Bernard Ntaganda yitabye urukiko rwa Kigali […]

Speak Your Mind

*