Polisi y’u Rwanda yafashe umuyobozi wa PS Imberakuri, Bernard Ntaganda
U Rwanda Ruzubakwa n'Amaboko y'Abana Barwo Bose

Polisi y’u Rwanda yafashe umuyobozi wa PS Imberakuri, Bernard Ntaganda

Ifatwa rya Me Ntaganda ryabaye ku munsi wo gutangira igikorwa cyo gutanga kandidatire k’umwanya w’umukuru w’igihugu.
Kigali – Polisi y’u Rwanda yataye muri yombi Maitre Bernard Ntaganda, umwe mubanyapolitiki batavuga rumwe n’ubutegesti mu Rwanda. Me Ntaganda niwe washinze ishyaka PS Imberakuri ryigenga kandi ryemerewe gukorera mu Rwanda, akaba yari yaremejwe n’ishyaka rye ritaracikamo ibice ko ari we uzaribera umukandida mu matora ya Perezida wa Repubulika yo ku ya 9 Kanama.
Abapolisi benshi bagabye igitero mu rukerera rw’ejo kwa Bernard Ntaganda, bica inzugi z’inzu ye, binjira ku ngufu, bahita bamutwara. Umuvugizi wa polisi yavuze ko Me Ntaganda ubu afungiwe kuri CID ku cyicaro gikuru cya polisi y’u Rwanda ku Kacyiru.

Polisi y’igihugu kandi yasatse ku biro by’ubuyobozi bwa PS Imberakuri. Umwe mu banyamakuru bakorera mu Rwanda wahageze, akanahakubitirwa, yatangarije Ijwi ry’Amerika ko yasanze polisi iterera hejuru ibintu byose byari muri iyo nzu.

Umuvugizi wa polisi y’u Rwanda, Eric Kayiranga, yatangaje ko batwaye ibintu byari kuri ibyo biro, nk’ ibimenyetso by’ibyaha bitandukanye Me Ntaganda Bernard akekwaho. Ibyo byaha polisi ivuga yabikoze mu mvugo yagiye atangaza, ivuga ko ari nyandagazi, ituka abandi banyepolitiki, ihembera amacakubiri n’amakimbirane mu Banyarwanda. Ibi byaha byari bisanzweho yanabishinjwe na Sena y’u Rwanda, hiyongereyeho ibyaha bishya byo kurema udutsiko tugamije guhungabanya umutekano w’igihugu, n’ikindi cyo kuba akekwaho kuba ari inyuma y’igikorwa cyashatse guhitana Madamu Christine Mukabunani, umutegarugori uyobora igice cya PS Imberakuri cyiyomoye kuri Me Ntaganda. Kuri icyi cyaha, mbere polisi yari yataye muri yombi Pasitoro Noheli Hakizimfura, ivuga ko ariwe ukiri inyuma.
Ifatwa rya Me Ntaganda ryabaye ku munsi wo gutangira igikorwa cyo gutanga kandidatire ku mwanya wa Prezida wa Repubulika.

Amashyaka atavuga rumwe n’ubutegesti mu Rwanda uko ari atatu, PS Imberakuri , FDU Inkingi, n’irirengera ibidukikije (Green Party), yari yateguye imyigaragambyo yo kwamagana amatora y’umukuru w’igihugu yo ku ya 9 z’ukwezi kwa 8. Iyo myigaragambyo yagombaga gukorwa mu gihe Paul Kagame w’ishyaka FPR riri ku butegetsi yashyikirizaga ye komisiyo y’igihugu ishinzwe amatora kandidatire yo kwiyamamariza manda ya kabiri ku mwanya wa Prezida wa Republika.

Mu duce tumwe na tumwe two mu mujyi wa Kigali aho abayoboke b’ayo mashyaka bagombaga kwigaragambiriza, hari hakwirakwijwe abapolisi benshi bazinduwe no kuburizamo iyo myigaragambyo.
Bagose ahantu hose abigaragambya bari guhurira kandi bafata abantu barenga 30 mu bari bitabiriye iyo myigaragambyo.

– Niba ushaka kwohererezwa emails z’ibyandikwa kuri Rwandinfo mu Kinyarwanda, kanda hano.
– Niba ushaka kujya usomera inyandiko zo kuri Rwandinfo mu Kinyarwanda ukoresheje RSS Reader yawe, kanda hano.

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Speak Your Mind

*