U Rwanda Ruzubakwa n'Amaboko y'Abana Barwo Bose

Itangazo rya Twagiramungu nyuma y’irahira rya Generali Kagame

par Faustin Twagiramungu.

<Banyarwanda, Banyarwandakazi,

Ejo taliki ya 6 Nzeli 2010, kuri “Stade Amahoro”, Perezida Paul Kagame watowe abinyujije mu nzira y’uburiganya (afitemo ubuhanga buhanitse), yirengagije ko yicishije Andreya Kagwa Rwisereka wa Green Party, ko yafunze abo yagombaga guhangana nabo mu matora, Victoire Ingabire Umuhoza wa FDU, Bernard Ntaganda wa PS-Imberakuri, aratinyuka azamura akaboko adafunze ingumi nk’uko asanzwe (yerekana ikigaza), arahira nta soni, imbere y’imbaga y’Intore ze na Rucagu, ko azongera kuyobora u Rwanda indi myaka irindwi.

Ubu rero bubaye ubwa kabiri, Perezida Kagame, yemeza Abanyarwanda yafashe nk’abana, ababwira ko yatsinze amatora. Ibyo noneho yanabivuze hari abayobozi batari bake bo muri Afurika barimo abandi banyagitugu, n’inshuti ze zikomeye, cyane nka Pasteri w’umunyamerika, Rick Warren wa “Saddleback church”, kugeza ubu ufata Perezida Kagame nk’umukiristu utarangwaho icyaha, yamusengeye avuga ko ngo abamurwanyiriza ko ari umwicanyi ngo SIBO MANA. Pasteri Rick Warren yaguye mu mutego wa Perezida Paul Kagame; ariko ntazatinda kumenya ko yibeshye.

Nibyo, bubaye ubwa kabiri Perezida Kagame arahira imbere y’igihugu n’amahanga ko azayobora u Rwanda ku bushake bw’Abanyarwanda, kandi azi neza ko ntashingano bamuhaye babivanye ku mutima, kubera ko bamuziho ibyaha akangari, n’ubugome yakoreye Abanyarwanda muri rusange. Uretse kwihisha inyuma y’imvugo ye isanzwe agira ati “nahagaritse jenoside, nazanye n’amajyambere”, Perezida Kagame azi neza mu mutima we ko ibyo aregwa bitatuma ayobora Abenegihugu.

Uku kurahira kwa kabiri kubaye mu bihe bikomeye cyane, ibihe Abayarwanda benshi barenga 93% batifuzaga ko, mu by’ukuri, Perezida Paul Kagame atakongeye kuyobora u Rwanda. Twese turahamya ko nta Munyarwanda n’umwe utazi ko gutora ari uguhitamo, ko kandi gutora no gutoreshwa ku ngufu bitandukanye. Kuvuga ko habaye “mobilisation” idasanzwe, ntabwo byatubuza kuvuga ko iyo “mobilisation” yabaye hakoreshejwe ingufu zidasanzwe, hakoreshejwe iterabwoba mu nzego zose z’ibanze, hakoreshejwe igitsure ku bayobozi, cyane kandi ko hakoreshejwe icengezamatwara rishingiye ku “ingengabitekerezo” y’ishyaka rimwe rukumbi rya FPR-Intore. Imikorere y’ishyaka rimwe rukumbi twarwanyije mu bihe byashize turayizi, kandi ntitwayibagiwe. Ubu muri iki gihe, iyo mikorere niyo yaragarutse, kandi igarukana amayeri menshi n’ubukana budasanzwe, kenshi burimo n’ubugome ndengakamere.

Impamvu zituma Abanyarwanda b’ingeri zose batagishaka ko Perezida Kagame akomeza kubabera umuyobozi w’igihugu cyabo, ni nyinshi, ariko twavuga iz’ingenzi:

1. Perezida Paul Kagame yanize demokarasi twarwaniye, demokarasi twatangiye ibitambo bitagira ingano, ahamba ishyaka MDR, maze amashyaka asigaye ayica urubozo, ariyo PSD na PL. Naho amashyaka mashya avuka ayica atarashinga intege, afunga abayobozi bayo, abandi arabica, abandi bakizwa no kumuhungira mu mahanga.

2. Perezida Paul Kagame nta n’ubwo yagize isoni zo gusenya FPR-Inkotanyi, imwe yashinzwe na yo ivuga ko ishaka demokarasi, ikanabyemeza mu masezerano ya Arusha. Ariko ikaza guhitamo intambara n’ubwicanyi, kubera ko aribwo buryo bwari buyibereye bwo gufata ubutegetsi mu Rwanda. Ubu Perezida Kagame yayishyize iruhande, kimwe n’abari bayirimo bataha mu Rwanda. Yayihinduye iye bwite, ayigira ishyaka ry’ubucuruzi ngo n’amajyambere. Ubu abari bagize FPR-Inkotanyi, uretse bake nka Madame Inyumba na Bwana Tito Rutaremara bemeye kujya muri FPR-Intore, abenshi baricajwe, abandi barafuznwe, abandi barishwe, ababishoboye baracitse akenshi bagakurikiranwa n’iyo bahungiye (Seth Sendashonga na Generali Nyamwasa).

3. Ubu Abanyarwanda bari mu gihugu cy’u Rwanda, Perezida Paul Kagame yabagize imbohe z’ubutegetsi bw’igitugu birenze urugero, mbese ubutegetsi bubi butari bwarigeze bubaho kuva u Rwanda rwitwa igihugu.

4. Kuva imyaka 16 ishize, Perezida Paul Kagame yiyemeje gutegekesha iterabwoba no guhahamura Abaturarwanda, maze ibyo kwica abo batavuga rumwe abigira intego idakuka mu Rwanda; u Rwanda ubu ayobora nk’isambu ye. Ibi ntabwo ari ugusebanya, na Perezida Kagame arabizi kandi ntabihakana. Kubera uyu mugambi wo kwica abamurwanya (mu gihugu no hanze), byatumye Abanyarwanda bamutinya ku buryo budasanzwe, none abenshi bahindutse ba “Nsekambabaye”.

5. Perezida Kagame yagaruye ibibazo by’amoko, abikora mu cyayenge n’iterabwoba bigeza aho adusubiza inyuma mu rwego rwo kubanisha Abanyarwanda nta buryarya. Kandi ibi abikora nkana yitwaje “jenoside yakorewe abatutsi gusa”, ubu akaba yarayigize igikoresho cye muri politike mpuzamahanga, akayigira n’intwaro ya “kirimbuzi” ku Banyagihugu cyane abitwa Abahutu bivugwa ko bose bafite icyaha cy’inkomoko kirangwa na “virus” bihariye y’ingengabitekerezo ya “jenoside”.

6. Perezida Paul Kagame yakoze amahano menshi kandi ndengakamere, iyo umubona agenda yidegembya nkaho nta cyaha arangwaho, wibaza niba aba ku isi.

Dore amwe mu mahano y’ubwicanyi inshuti ze z’amahanga zikomeje guhishira:

A) Perezida Paul Kagame, yishe, yabigambiriye, Perezida Yuvenali Habyarimana w’u Rwanda, na Perezida Cypriano Ntaryamira, hamwe n’abo bari kumwe mu ndege. Paul Kagame yabahanantuje igisasu cyitwa “missile”. Ibi kandi Perezida Kagame we ubwe yarabyiyemereye kuri TV ya BBC.

B) Ku itariki ya 20 Mata 1995, Perezida Kagame yatanze itegeko ryo gusenya inkambi y’Abanyarwanda bavanywe mu byabo n’intambara (deplacés, displaced) yari muri Nyaruguru ahitwa i KIBEHO, mu cyahoze ari Gikongoro, bari baranze gusubira iwabo kubera ko nta cyizere bari bafitiye Leta ya FPR. Bararashwe, abasirikare ba FPR bicamo abarenga ibihumbi 6.000 nk’uko byavuzwe n’uwari ahagarariye LONI, abagore batwite, abakecuru, abana, abasaza n’abandi batashoboye kubona uko bakwiruka.

C) Kuva mu Ugushyingo 1996 kugeza muri Kanama 1997, Perezida Kagame yateje intambara igamije gufata Congo, yitwaje gusenya inkambi z’impunzi z’Abanyarwanda, no kuzicyura ku ngufu, impunzi zitemeye gutaha mu Rwanda ku ngufu zarakurikiranwe, ziricwa; ku buryo abasirikare be biciye mu mashyamba ya Congo Abanyarwanda batari munsi y’ibihumbi 150.000. Kandi we ubwe yarabyigambye mu nteko ishinga amategeko avuga ko yacyuye impunzi ku ngufu, izabyanze akazirasa, ari nabwo abadepite (barwaye) bamuhaye amashyi y’urufaya.

D) Abandi bishwe ni Abihayimana banyuranye, Abesipanyolu, n’Abanyakanada, n’abandi banyamahanga bihaye Imana bari mu maparuwasi yo mu byaro. Yishe kandi n’abanyapolitike bari mu mashyaka anyuranye nka Emmanuel Gapyisi wa MDR, Felesiyani Gatabazi wa PSD, Seth Sendashonga wa FPR, Martin Bucyana wa CDR, depite Rwambuka wa MRND, Assiel Kabera wa PL, Dr. Hitimana wa MDR. Abandi barafunzwe nk’uwahoze ari Perezida w’u Rwanda, Pasteur Bizimungu, na Ministri Karoli Ntakirutinka, abandi barahunze nka ba Perezida babiri b’Inteko ishinga amategeko, aribo Sebarenzi na Mukezamfura, n’abaministri b’intebe, n’abaministri banyuranye, cyane nk’ uw’ingabo n’uw’umumutekano w’igihugu.

E) Perezida Paul Kagame yicishije abasirikare benshi, bari mu rwego rwa ba “officers” (officiers) harimo na Major witwa Francis Rwagasana mwene Rwagasana wagizwe Intwali (wari umukarani mukuru wa UNAR); abandi barahunze, ariko ntibibuza Perezida Kagame kubasanga iyo bahungiye ashaka kubarimbura n’imiryango yabo.

Umukuru w’igihugu ubundi yakagombye kurangwa n’ubutabera, akagira urugwiro n’urukundo rw’abo ashinzwe kuyobora, akagira ibiganza byera, ibiganza bigaba amariza. Perezida Kagame abagaragu be biyita ko ari n’abagaragu b’Imana, bamwita Salomoni (mwene Dawudi), ariko babimwita bamubeshya kuko mu by’ukuri bazi neza ko atabikwiye.

Kurahirira imbere y’Abanyagihugu, n’Abanyamahanga ntabwo ari igihe cyo kwiyama abavuga ko Kagame ari umwicanyi, no kwemeza ko yazaniye Abanyarwanda amajyambere, nk’aho nta majyambere yari mu Rwanda mbere y’uko FPR itera u Rwanda muri 1990. Ntabwo ari bwo bwa mbere u Rwanda rubaye intangarugero muri Afurika. Ubutegetsi bwariho mbere, ari nabwo bwashwanyagujwe na FPR, niba bwari butarazana za “mudasobwa” ni uko zari zitarabaho. Mbona ibyo ntawabikangisha.
Icyo dushaka si amajyambere gusa.
Turashaka “amahoro ku giti cy’umuntu”,
Turashaka “umubano mu bantu”,
Turashaka ko ikibazo cyo guhunga igihugu cyacu kirangira burundu,
Turashaka demokarasi twaharaniye kuva kera.
Turashaka demokarasi twatangiye ibitambo. Demokarasi ntibanzirizwa n’amajyambere, demokarasi ibanzirizwa n’ubworoherane. Nta demokarasi itagira ubutabera. Demokarasi ijyana no guhana abanyabyaha bose, n’iyo baba ari ba perezida. Nta mwicanyi uhana abandi bicanyi. Nta mwicanyi dushaka ku butegetsi. Ayo majyambere uko yaba ameze kose azasenyuka, igihe tutazaba twishyira kandi ngo twizane mu gihugu cyacu, igihugu ubu tutakigiramo ijambo, ngo keretse tubaye INTORE za Rucagu.

Ntabwo kuba Perezida Kagame ejo yararahiye imbere y’abandi bategetsi b’igitugu b’Abanyafurika, ntabwo aribyo bimuhindura umwere. Nta n’ubwo aribyo bizatuma ibibazo u Rwanda rufite birangira. Ntabwo kurahira ariko kuzura abo Perezida Kagame yatsinze mu mashyamba ya Congo. Byose bizarangizwa n’uko Perezida Paul Kagame yemeye ibyaha yakoze, akabihanirwa, cyangwa akabiherwa imbabazi.

Bikorewe i Bruxelles, tariki ya 07 ukwa Nzeli, 2010
Faustin Twagiramungu
Wahoze ari Minisitiri w’Intebe

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Comments

  1. Kznz says:

    Ni byiza gusoma ibitekerezo nk’ibi bitangwa n’uwigize kuyobora igihugu. Ntagushidikanya ko Bwana Twagiramungu azi byinshi ku byabereye mu Rwanda. Gusa ikibazo kimwe numva nshaka kumubaza ni iki: iyo yibutse ukuntu yarwanije Habyarimana Yuvenari, agafatanya n’inkotanyi kumurwanya, akamuteza abanyarwanda ngo bamwange. ubu yumva aticuza ibyo yikoreye kugiti cye n’ibyo yakoreye abanyarwanda muri rusange? cyane cyane abahutu benewabo? jye na mugira inama yo kwandika yicuza akanagerageza kutwereka amakosa cyangwa kwibeshya we ubwe yumva yaragize n’ingaruka abona byateje abanyarwanda, aga contributing ku kumenya no kumenyekanisha amateka y’urwanda. Byashimisha abantu mu mvugo ye no munyandiko ye yanditse agira ati: “iyo mbimenya”

  2. jemadari says:

    Dore inkuru yabantu babaye abayobozi bakomeye bibihugu byibihangange ukuntu bishimiye ko Kagame agiye kongera kuyobora urwanda ariko ugasanga abantu barangije igihe nka Twagiramungu aracyasakuza avuga imyanda gusa.
    Wa musaza we, n’utava muliyo myanda uzanasara.Igihe cyaragusize kabisa!!!!!!!!!!!!!!!!

    Tony Blair wahoze ari Minisitiri w’Intebe w’u Bwongereza, ubu akaba ari Umuyobozi wa AGI (Africa Governance Initiative), akaba kandi umujyanama wa Perezida Kagame, yamwoherereje ubutumwa bw’Ishimwe nyuma yuko ku munsi w’ejo yarahiriye kongera kuyobora u Rwanda indi manda y’imyaka 7.

    Newtimes iravuga ko mu butumwa bwe, Blair yavuze ko uburyo iyi manda Kagame agiye kuyobora byagaragaye mu kwiyamamza no mu matora ko abanyarwanda bari bamwishimiye, ari igihamya cy’uburyo ari umuyobozi mwiza.

    “Nishimiye uburyo Kagame agiye kuyobora u Rwanda indi myaka 7. Azakomeza ibikorwa bye by’iterambere, azamura kandi afatanya n’abanyarwanda guteza imbere igihugu.” Ayo ni amwe mu magambo ari mu butumwa bwa Blair.

    Tony Blair kandi mu butumwa bwe yanashimye u Rwanda uburyo rwateye imbere ku buryo butangaje nyuma ya Jenoside yakorewe abatutsi mu mwaka wa 1994. « U Rwanda rwateye imbere ku buryo butangaje. Ugushora imari, Uburezi, ubwuzuzanye bw’abari n’abategarugori byose byageze ku rwego rushimishije. » Blair kandi yashimye uburyo u Rwanda rwongeye kwiyubaka vuba kandi rukimakaza Ubumwe n’Ubwiyunge.

    AGI, Africa Governance Initiative, kuri ubu iyobowe na Tony Blair ; kuva mu wa 2008 yafashije Leta y’u Rwanda mu kubaka imiyoborere myiza mu nzego za Leta hagamijwe kurwanya ubukene no kubaka amajyambere arambye.

    Hagati aho, si Tony Blair wenyine woherereje ubutumwa bw’ishimwe Perezida Kagame nyuma yo kurahira kongera kuyobora u Rwanda imyaka 7 nkuko Newtimes ikomeza ibivuga. Bamwe mu Bakuru b’ibihugu na za Guverinoma na bo bohereje ubutumwa bw’ishimwe bamwifuriza gukomeza kujya mbere no kurushaho kubaka igihugu.

  3. Fidel says:

    Ahubwo jye mbona Twagiramungu yarakozwe n’ikijmwaro,gikabije.Kuko iyo ukurikiranya Twagiramungu ukamuhera mu mizi kuva akiyobora STIR usanga biriya agereka kuri perezida ariwe wabibanje biragutangaza ko akiyobora STIR abakoragamo hafi ya bose bari abanya Cyangugu.Ku rupfu rwa sebukwe Gregoire Kayibanda wagirango ntiyigeze arumenya,kuko kuva nakumva Twagiramungu sinigeze numva haraho avuga iyicwa ry’agashinyaguro bishe Sebukwe.

    Wonere ugaruke muri za 1992 ukulikiranye amakuru ye yicyo gihe mu binyamakuru byariho,RTLM,ibyo yavugiragaho birimo ubwirasi n ‘ubwishongore byari bikabije,ibyo binyamakuru bimurega kugurisha igihugu ngo agiha FPR.

    Reka tugere mu gihe yari PM.None icyo gihe ko yari afite ubushobozi yasobanura ate ko ibyo ariho arega Kagame uyu munsi ibyo yakoraga icyo gohe nukuvuga se ko icyo gihe atabibonaga none akaba atangiye gusakuza imyaka 16 ishize?icyo gihe cyose yakoraga iki?Ahubwo yari akwiye gusobanurira abanyarwanda ukuntu Kagame yishe abantu bangana kuriya twagiramungu abizi abireba ntagire icyo avuga ntasakuze none aba atangiye gusakuza uyu munsi yaba afite uruhare mu bantu bapfaga icyo gihe ariho ashinja perezida Kagame!!

  4. kayitesi sonia says:

    erega Twagiramungu aribeshya ntacyo ateze guhindula kuli twe abaturage kuko natwe ukuli turakwibonera KAGAME numuyobozi mwiza cyane. wowe ko jenocide yabaye uyirora wakoze iki? ntukadushyireho ntitukiri injiji. uzabanze utahuke ubivuge urino uve mubunzi.

  5. trouth says:

    njye muransetsa, wagira ngo akazi mufite ni ako kwandika. president yaravuze ngo n’iyintwaro twarayitsinze, iy’amagambo nayo tuzayitsinda. gusakuza kuri za forums ntacyo bimaze. ese ko mbona mwandika byinshi musobanura inzirakarengane ziciwe congo na za kibeho, ibyo simbihakana ku burigihe there are victims of war cyane cyane nkizi ntambara ziwacu usanga abarwanyi bihisha mu baturage nkuko byagiye bigaragara. ariko se ko mbona mutajya mwandika ibyerekeye genocide y’aba tutsi kandi ariyo nyirabayazana? mwibwira ko kagame iyo ashaka gutegura genocide nkiyo habyara yateguye muba muri kuvugira ku mbuga? mujye musenga ahubwo afite ubumuntu.

  6. mukaruriza says:

    Faustin we, washaje neza, ukareka gukomeza kwanduranya kuko wananiwe kera guha urwanda ikyerekezo kiza nkumuntu w’ukambwe wari wagiriwe ikizere arusha. Ayo namateka mabi uzasiga kwisi. uje uceceka rero aho bigeze. imana ibigufashemo.

  7. moussa nsengiyumva bazil says:

    burimunyarwanda aho ava akagera azi ibibazo bye nkumunyarwanda.mujye muvuga make

  8. rugamba says:

    rwose wamusaza we baravuga mukinyarwanda ngo NTAWE USAZA ATISENYEYE .wewo rero menya ko igihe abanyarwanda tugezemo s’ayibigambo wirirwa usakuzamo .kubantu bagize uruhare mugukuraho umwijima wabibye mubanyarwanda ubashinja ubusa. ese ubu kuva waba muli reta zose umaze kujeza kuki abanyarwanda? ubushize wariyamamage abanyarwanda bihitiramo ubanogeye unanirwa kuguma mugihugu cawe wirirwa usakuza ntaco umaze pepepepe “U’R A WASTE OF SPACE” IKYADUHA UGAHERA IYOWAGIYE NIMBA UDASHOBORA GUHINDUKA. IF U CANT CHANGE THEN CHANGE WILL CHANGE U.

  9. Ivan Nkomati says:

    Nje ndabona ibyo wandika byose bishingiye ku njengabitekerezo…
    ese wowe ko wabayeho umwe mubayobozi wakoreye iki abanyarwanda? usibye guhora mumahanga!!!!!!!
    ahubwao mbanze waraneye isoni!!!!!!
    our 2020 Vision is it see Rwanda Moving forward with solutions no debates….

  10. kiki kouate says:

    Ukuri tugezemo abe ariko tuvuga ba sha. Abanyarwanda ubu twabaye nk’inkoko yumusinzi. uzi ko itagira manda ndetse itembera yishishe. umusinzi ashobora kwinjira nijoro cyane yadandabirana akayigwira akayivuna ijosi cyangwa akayibagira igihe ashakiye nta plan… nguwo umugani ukwiye kagame kubanyrwanda bose. Ubwo se mwe muravuga iki muri mu gihugu gitemba amaraso namashyira. Nubwo mwagira ibihanga byibihanika nibisage byingara ziminyinya bazabakandagira ntimwarushaga ubwiza Kayumba, Rwigema na Sebarenzi. Muvuge muziga

    Butare campus nonaha………..

  11. Beatrice says:

    Umusaza arashaka ku dusubiza inyuma pee, lakini tuta songa mbele, wichaye hanze urya ama friti, Kagame wacu kubera kutwitangira nta tora na 100 grames, tumuri imyuma wowe ceceka wisazire neza, ariko uza gwa mu mahanga wa tashye ko dufite amahoro ugasaza abi wawe ba kuri hafi, uza pha nki sazi, pole saana; umecoka mzee, kandi ubuze icyitwa sagesse.

  12. Alan Nkusi says:

    Nimujye mbere , simbujije !
    Agatsinda iyo vision 2020 mwasakurije , njye ndayishaka nkayibura !
    Amazu angahe muri Kigali , au detriment du reste du pays , nibyo mwita amajyambere ??
    Nawe se , mwarasakuje ngo UNR na universites zanyu magana zasohoye abanyeshuri bakubye incuro 10 abize guheza 1963 . Ariko nibaza icyo bimaze guha diplome umuntu utabasha kudefenda these avuga ko yanditse (n’ubwo binazwi ko nyinshi zandikiwe muri 1930). Ubwo se iyo knowldge based economy mubona izava muri izo nkandagira-bitabo ??
    Mwirirwa muvuga ngo ubumwe , ubwiyunge , ubunyarwanda etc … mwaciye amoko mu ndangamuntu ! What for ?? Hari uyobewe ubwoko bwe ?? Muze kumva BBC y’ ejo hashize (le 15/10/ 2010) . Nyuma y’ imyaka 16 mutegeka , 47 % by’ ababajijwe barerura bakavuga ko abahutu n’ abatutsi badacana uwaka !! Yewe n’ abo 53 % bavuga ko ngo biri kugenda bijya aheza , ariko se bigeze hehe ??

    Mwaje muje ngo kuvanaho ubuhunzi , no guca impamvu zabwo zose! Ngira ngo uwa mbere uzi agaciro k’ iki kinyoma ni mwene wanyu Kigeli muhejeje hanze na Kayumba mwakurikiranyeyo . Aha ho sinanabona icyo mvuga … Ku butegetsi bwa Kagame, u Rwanda rufite impunzi ziruta izo ku bwa Kayibanda wongeyeho izo ku bwa Habyara ! Ngaho abahunga politiki mbi (Kayumba we ntatinya no kuguga “ubusutwa/ubugambo mu ngabo “) , ngaho abahunga kuko babona nta kigenda economiquement (uzabaze abana barangiza amashuri ku bwa Habyara bakaguma hanze uko banganaga ubagereranye n’ abahaguma ubu ). Kuri ubu abana barangiza kwiga cg barangiza ubundi butumwa bagiyemo mu mahanga basaba ubuhungiro deja !!
    Umutekano wanyu nawo ni formule yihariye. Nta na rimwe amahoro ava mu kurata imitsi . Aha muzabibwira n’ iminsi . Muteye Congo , muhora mu mahane na Museveni , mu Rwanda imbere ni iterabwoba mu matora , mu bucuruzi , … hehe hose ni za maneko . Service de renseigement ingana nk’ iyanyu mujya mwibaza budget ifata uko ingana ?? Ariko ndabarenganya da ! nawe se , umuntu yava mu wa 4 w’ ayisumbuye (nawo akawurangiza atsinzwe) , maze akazamenya budget n’ icyo ivuga ?? naho ntako muba mutagize !

    Murarata ngo ibyiza n’ amajyambere .?? Ntacyo mvuze , nimutere imbere ra ! Ahaaaa …

    Tanga amahoro , Rwanda we !

  13. peter says:

    ese ko mutavugira Nkunda we azaba uwande?

Speak Your Mind

*