U Rwanda Ruzubakwa n'Amaboko y'Abana Barwo Bose

Igihe kirageze ngo dusezerere ingoyi

par Victoire Ingabire Umuhoza.

BANA B’U RWANDA, IGIHE KIRAGEZE NGO DUSEZERERE INGOYI

Victoire Ingabire, Umuyobozi wa FDU-Inkingi

Victoire Ingabire, Umuyobozi wa FDU-Inkingi

Banyarwanda,
Banyarwandakazi,
Nshuti z’u Rwanda n’iz’Abanyarwanda,

Nyuma y’imyaka 16 mba mu buhungiro, nagarutse mu Rwanda mu mahoro. Ari njye ubwanjye ari n’ishyaka ryacu FDU INKINGI, ayo mahoro ni rwo rumuri rutumurikira mu rugamba rwa politiki rugamije guca akarengane n’ingoyi zose Abanyarwanda bariho.

Birazwi ko Abanyarwanda bahangayitse kandi bafite ubwoba, bakaba bategereje ingamba zihamye z’ubumwe n’ubwiyunge bijejwe.

« Tuzi neza ko icyo kariya gatsiko kagamije ari ukugundira ubutegetsi kafashe ku ngufu z’intwaro. »

« Igihe kirageze ngo twibohore ingoyi zose z’ubutegetsi bw’igitugu. Igihe kirageze ngo dusabe gusubizwa agaciro twateshejwe, ngo twange ku mugaragaro agasuzuguro, ndetse duharanire ko ntawongera guhungabanya ubuzima bw’Umunyarwanda no kumuvutsa ukwishyira ukizana. »

« Niboneye n’amaso yanjye iteshagaciro, akarengane, kuzira ubusa, kunenwa, agasuzuguro, agashinyaguro, igitugu no kwishongora bikorwa n’ishyaka riri ku butegetsi, rikoresheje abakada baryo cyangwa izindi nkundarubyino. »

« Amatora ya Perezida wa Republika yo mu kwa munani ni ikinamico. »
« Ibizava muri iyi ngirwa matora twese turabizi. Ntaho bihuriye n’inyungu za rubanda. »
« Abanyarwanda ntituzemera ayo matora, kugeza ubwo tuzasubirizwa uburenganzira bwacu bwo gutora mu bwisanzure nta mafifiko. »

« Kugera kure si ko gupfa. Abanyarwanda bakomeje kwibasirwa n’ingoma y’igitugu ikomeje kubahonyora. Benshi muri bo bemeye kuyoboka ngo bakize amagara yabo. Icy’ingenzi ni uko bagihumeka, ntabapfira gushira. »

« Mu bwitonzi ariko nta mususu, tuzakomeza duhangane n’iterabwoba ry’ingoma ya Jenerali Paul Kagame. »

« Buri wese muri twe, akurikije ubushobozi bwe, afite uruhare mu guhindura imitegekere y’igihugu cyacu twifuza twese. Igisigaye ni ubutwari bwo guhamya icyo cyifuzo no kugiharanira muri kino gihe. »
Victoire Ingabire Umuhoza.

Njyewe n’ishyaka ryacu twiyemeje kurwana urugamba rwa politiki ruzatugeza ku ntsinzi yo kuvanaho akarengane ako ari ko kose maze tukimakaza demokarasi nyayo ishingiye ku kwishyira ukizana kwa buri muntu. Mu minsi mike iri kinamico ry’amatora rirongera ryimakaze ingoma y’igitugu. Ibizava muri iyi ngirwa matora twese turabizi. Ntaho bihuriye n’inyungu za rubanda. Tuzi neza ko icyo kariya gatsiko kagamije ari ukugundira ubutegetsi kafashe ku ngufu z’intwaro. Izo ngufu nizo gakoresha mu kwimakaza igitugu. Iri kinamico ry’amatora ni ubuhendabana bwo guhuma amaso amahanga.

Bana b’u Rwanda, igihe kirageze ngo twibohore ingoyi zose z’ubutegetsi bw’igitugu. Igihe kirageze ngo dusabe gusubizwa agaciro twateshejwe, ngo twange ku mugaragaro agasuzuguro, ndetse duharanire ko ntawongera guhungabanya ubuzima bw’Umunyarwanda no kumuvutsa ukwishyira ukizana.

Igisubizo cyacu ku birebana n’iri kinamico ry’amatora ni ukuyamagana mw’ituze, tugaragaza ko tutemera uko yateguwe mu muhezo w’abatavuga rumwe n’igitugu, uko ariho ayoborwa ndetse n’ibizayavamo.

1. Urugamba rwacu rwa politiki.

Ibigamijwe by’ibanze.

Icyo twimirije imbere ni ugusezerera ubutegetsi bw’igitugu maze tukimika ubutegetsi buhumuriza abaturage b’ingeri zose ku buryo nta n’umwe uzongera kuvutswa ubuzima azira inkomoko ye, ubwoko, idini, akarere avukamo cyangwa ibitekerezo bye bya politiki. Iyo niyo nshingano ishyaka ryacu FDU INKINGI ryihaye kuva rivuka. Iyo nshingano rero ni yo shingiro ry’ibikorwa byanjye kuri uru rugamba rwa politiki ndwana hano mu Rwanda. Tugomba gutsinda ubwoba kugirango tubashe kwivana ku ngoyi.

Turifuza gutsinda ibyorezo byugarije u Rwanda. Muri byo harimo ubukene, inzara, icyenewabo, kurya ruswa no kubeshya abaturage byahawe intebe n’ingoma ya FPR Inkotanyi. Turifuza kurwanya ubusumbane hagati y’abaturage, ivangura ndetse n’umuco wo kunyaga abenegihugu amasambu yabo cyangwa undi mutungo.

Turamagana ubutegetsi bw’igitugu, akarengane, imibogamire y’inkiko za Gacaca n’imirimo nsimbura gifungo yemezwa n’ubucamanza bushingiye kw’ivangura no kubogama.

Turifuza ko buri Munyarwanda agenda yemye mu gIhugu cye, ntabundabunde, ntagendane isoni. Turashaka kuvanaho inzitizi zose zibuza Abanyarwanda kumva ko ari abenegihugu nyabo.

Ku bijyanye n’uburezi, turashaka kuzamura urwego rw’imyigishirize ndetse n’igenwa ry’ibyigishwa hakurikijwe ibyo igihugu gikeneye kandi urwego rw’imyigishirize ntirujye munsi y’urw’ibindi bihugu, turashaka gushimangira icyubahiro umwarimu akwiye, tukongera ibikoresho mu mashuli kandi tugaha abana bose b’Abanyarwanda amahirwe angana mu mashuli ntihazemo ivangura rishingiye ku bukire, igitsina, ubwoko cyangwa idini.

Mu birebana n’ubuzima, intero yacu ni « ubuzima kuri bose ». Ibyo bikagerwaho twongera amavuriro bityo Abanyarwanda bose bakagira hafi aho bivuriza, twongera umubare w’abakozi bafite ubushobozi kimwe n’ibikoresho byo kwa muganga ndetse n’imiti.

Ukumererwa neza kw’abaturage ni yo nshingano yacu ya mbere. Buri murimo ugomba kubahwa kandi ugatuma uwukora ahabwa umushahara ukwiye. Birihutirwa guharanira kugeza ku batuye icyaro imiturire myiza, mu mazu asukuye kandi bakagezwaho amazi meza.

Ubuhinzi bugomba mbere na mbere kugaburira Abanyarwanda bagahaga kandi bugateza imbere n’abahinzi borozi.

Umushinga wacu ni uw’abanyarwanda bose.

Gahunda yacu ya politiki, irararika buri Munyarwanda nta vangura rishingiye ku bwoko, akarere, igitsina, umwuga cyangwa ubutunzi. Tugamije kwubaka u Rwanda ruhuza abantu bose, ibyo bigasaba kutibagirwa ibyabaye byose, kwubaha mugenzi wawe, kwicara hamwe tugashaka ibisubizo by’ibibazo by’ingutu biriho, guhumuriza ba nyamucye no guha buri wese amahirwe yo guharanira kubaho neza. Abacitse ku icumu ry’itsembabwoko n’itsembatsemba bakeneye kwitabwaho by’umwihariko. Turashishikariza abagize ingabo z’igihugu n’ urwego rw’abapolisi ndetse n’izindi nzego zishinzwe umutekano ko mu kazi kabo bahora bazirikana ko bakorera igihugu cyose bityo bakirinda kubogamira ku gice icyo ari cyo cyose. Uwo mugambi kandi tuwurarikiye abakora mw’itangazamakuru, abakozi ba Leta b’ingeri zose kimwe n’abacamanza.

2. Natashye mu gihugu nsanga ingoyi n’itotezwa.

Amezi 6 maze mu Rwanda, n’ubwo nahise nshyirwa ku ngoyi ngafungishwa ijisho, yanyumvishije kurushaho uburemere bw’igikorwa niyemeje ndetse n’impamvu urugamba twiyemejwe rwo guharanira kurandura ubutegetsi bw’igitugu. Tugomba gukomeza byanze bikunze. Ndemeza ntazuyaza ko u Rwanda rugomba kuyoborwa ku bundi buryo kugira ngo abenegihugu n’abagituye bamererwe neza.

Niboneye n’amaso yanjye iteshagaciro, akarengane, kuzira ubusa, kunenwa, agasuzuguro, agashinyaguro, igitugu no kwishongora bikorwa n’ishyaka riri ku butegetsi, rikoresheje abakada baryo cyangwa izindi nkundarubyino. Hamwe n’abasangirangendo banjye muri uru rugamba twahohotewe mu buryo bwinshi n’ubutegetsi bwa Paul Kagame kandi n’ubu bigikomeza. Uburenganzira bwacu, ndetse n’ubw’abandi banyagihugu benshi buhora bunyukanyukwa.

Nyamara n’ubwo bamwe bishwe, n’ubwo badutesheje agaciro, bakadukubita, bakatuvutsa uburenganzira bwacu, bakabuza abantu bose barwanya ubutegetsi n’abanyamakuru gukora, bakadukoreshaho iterabwoba, bakadufunga binyuranye n’amategeko kandi bakadukorera ibya mfura mbi, ntitwatezutse ku mugambi wacu.

2.1. Guta ku munigo no gushyira ku ngoyi abatavuga rumwe n’ubutegetsi.

Amashyaka 3 arwanya ubutegetsi yibumbiye mu mu Nama Ihoraho yo kungurana ibitekerezo hagati y’amashyaka arwanya ubutegetsi ahozwa ku nkeke:

– Abarwanya ubutegetsi turacyari mu cyunamo cy’inzirakarengane Bwana André KAGWA RWISEREKA wari wungirije umuyobozi w’ishyaka riharanira demokarasi n’ibidukikije wazimiye ku itariki ya 13 Nyakanga 2010 bwacya umurambo we ukaboneka bamwishe agashinyaguro, bakamukata n’ijosi.

– Iryo shyaka ryahejejwe mu gihirahiro mu gihe ryashakaga kwiyandikisha ngo rikorere ku mugaragaro kandi na n’ubu abayobozi baryo ntibasiba kubona amagambo abamenyesha ko niba badahagaritse ibikorwa byabo bazicwa urw’agashinyaguro.

– Ishyaka PS IMBERAKURI ryari ryaramaze kwiyandikisha ryaciwemo ibice 2 kimwe kibogamiye ku ishyaka riri ku butegetsi. Umuyobozi w’ishyaka ari na we waritangije, avoka Bernard NTAGANDA ari mu munyururu kuva kuwa 24 Kamena 2010 akaba aregwa guhakana itsembabwoko, kuzana amacakubiri mu banyarwanda no gushyiraho agatsiko gakoresha iterabwoba. Umunyamabanga we wihariye Bwana Aimable SIBOMANA RUSANGANWA yarazimiye kuva kuwa 13 Kamena 2010.

– Ishyaka FDU-INKINGI ritari ryandikwa na ryo ubutegetsi bw’igitugu ntiburyoroheye kuko abantu 3 mu bagize komite nyobozi yaryo y’agateganyo bafungishijwe ijisho.

2.2. Umugambi wo kurwanya ishyaka FDU INKINGI.

Mu Rwanda, kugira ngo ishyaka rya politiki ryemererwe ku mugaragaro, rigomba kubanza kwiyandikisha. Ni yo mpamvu FPR yagize inzira yo kwiyandikisha imfunganwa irangije iyikikiza imishubi kugira ngo ishyaka ritavuga rumwe na yo ryose rizabure uruvugiro mu gihugu. Ishyaka FDU INKINGI ni rinini ku buryo ritakwirwa muri iyo mfunganwa. Ubwoba bw’uko ishyaka nyaryo rya politiki ritavuga rumwe na FPR ryaza guhangana na yo bwatumye urusyo rw’ubutegetsi bw’igitugu rusya rutanzitse. Hashyizweho amategeko atabarika agamije kwimira uwashaka wese kwinjira muri iki kibuga FPR ikiniramo yonyine.

Kuva muri Mutarama 2010, ishyaka FDU INKINGI ryabujijwe inshuro 6 zose gutumiza inama y’igihugu irishinga ku mugaragaro. Ubutegetsi bw’inzego zose bwitwaje ibyaha by’ibihimbano biregwa Umuyobozi w’ishyaka ari na we mukandida waryo mu matora y’Umukuru w’Igihugu.

2.3. Kugirwa imbohe itaburanishwa.

Amezi amaze kurenga 5 ubutegetsi butabasha kugaragariza ubucamanza ibimenyetso by’ibyaha biregwa Madamu Victoire INGABIRE UMUHOZA, Umuyobozi wa FDU INKINGI. Ibirego bamuhimbira byo gupfobya itsembabwoko, kuzana amacakubiri mu banyarwanda no gukorana n’agatsiko gakoresha iterabwoba ni urwitwazo ngo babone uko babuza abantu gukora politiki. Ni muri urwo rwego nafashwe ku itariki ya 21 Mata 2010, kuva icyo gihe nkaba mfungishijwe ijisho kugeza ubu. Hagati aho abambari b’ingoma iriho, itangazamakuru rya Leta kimwe n’irishyigikiye ubutegetsi ntibahwemye kumparabika. Abanyamategeko banyunganiraga nabo barafunzwe. Yarafunzwe umwarimu w’umunyamerika Peter ERLINDER, usanzwe yunganira abaregwa mu Rukiko Mpuzamahanga rw’Arusha amara ibyumweru 3 mu munyururu. Yarafunzwe umunyamategeko Théogène MUHAYEYEZU amara ibyumweru 2 mu munyururu.

2.4. Gufungwa, gutotezwa no gukangishwa kuzicwa.

Igikorwa cyo gukukumbira mu munyururu abatavuga rumwe n’ubutegetsi bari bateganyije kwigaragambya mu mahoro cyatangiye kuwa 24 Kamena 2010. Hari abayoboke ba FDU INKINGI benshi bafunzwe: Bwana Sylvain SIBOMANA, Umunyamabanga Mukuru w’agateganyo ; Umutegarugori Alice MUHIRWA, Umubitsi w’agateganyo w’ishyaka; Bwana Théoneste SIBOMANA, umwe mu bayobozi b’ishyaka i Kigali na Bwana Martin NTAVUKA, umuyoboke wa FDU Nyarugenge. Bose batotejwe na bamwe mu bapolisi. Umutegarugori Alice MUHIRWA yaviriye mu nda bitewe no gukubitwa ku nda. Bamubujije kujya kwa muganga kugeza ubwo yikubise hasi imbere y’umucamanza mu rukiko. Mu bihe byo kubatoteza mu nzu z’imbohe, hari amagambo babwiwe agaragaza urwango runuka ndetse n’ivangurabwoko. Abamwicaga urubozo kandi bamwijeje kumurekura ariko akabanza gushyira umukono ku mpapuro z’impimbano bari bateguye zashinjaga Madamu Victoire INGABIRE UMUHOZA n’Umunyamategeko Bernard NTAGANDA gukorana n’inyeshyamba za FDLR no gukoresha amafaranga aturuka kuri izo nyeshyamba ngo yaba anyuzwa ku byitso biri muri Kigali. Ibi biragaragaza ko ubutegetsi bwiteguye gufata no gutoteza abantu benshi mu mugi wa Kigali muri iyi minsi iri imbere. Dukurikije ubuhamya bwakorewe imbere y’ubucamanza, umunyamabanga mukuru w’ishyaka PS IMBERAKURI nawe yasabwe gusinya impapuro nk’izo zo gushinja abayobozi b’amashyaka kugira ngo bareke kumukorera ibyamfurambi.

Hari umwe mu bayoboke b’ishyaka FDU INKINGI wabuze kuva kuwa 24 Kamena 2010 ishyaka rikaba rikomeje iperereza ku irengero rye.

Mu gihe bari bafunze, abagize komite y’agateganyo ya FDU INKIGI babwiwe ko bashobora gupfa niba bataretse urugamba biyemeje. Tukaba rero twibutsa ubutegetsi bwa Jenerari Paul KAGAME ko bufite inshingano zo kurinda umutekano w’abaturage no gushyikiriza ubucamanza abakora ibikorwa byo gutoteza, kwica urubozo n’ibikorwa binyuze ukubiri n’uburenganzira by’ikiremwamuntu n’abakoresha imvugo y’ivanguramoko kandi yuzuye urwangano.

3. Muhaguruke, duharanire inkundura ya demokrasi

Amatora ya Perezida wa Republika yo mu kwa munani ni ikinamico : agomba rero guhagarara bidatinze. Turasaba ko yakwigizwayo maze amashyaka atavuga rumwe na FPR akandikwa, abayobozi bayo bagahanagurwaho ibyaha bakomeje kubagerekaho nta shingiro, itegeko rigenga amatora rigasubirwamo kandi hakanashyirwaho Komisiyo ishinzwe kugenzura amatora yumvikanyweho n’amashyaka yose.

Niba rero ingengabihe y’amatora idasubiweho, amashyaka atavuga rumwe na FPR agakomeza kuniganwa ijambo no gutotezwa, abategetsi ba yo bagakomeza kwicwa turasanga abitwa abagenzuzi b’amatora, baba Abanyarwanda cyangwa se abanyamahanga, bazamera aka cya kirondwe cyumira ku ruhu inka yarariwe kera. Ubutegetsi bukomeje gutegura amatora mu buriganya, haba ku birebana n’amalisiti y’amatora, haba ku mubare w’abazatora, haba ndetse no mu buryo amajwi azabarurwa.

Nibikomeza gutyo, Abanyarwanda ntituzemera ayo matora, kugeza ubwo tuzasubirizwa uburenganzira bwacu bwo gutora mu bwisanzure nta mafifiko.

Kugera kure si ko gupfa. Abanyarwanda bakomeje kwibasirwa n’ingoma y’igitugu ikomeje kubahonyora. Benshi muri bo bemeye kuyoboka ngo bakize amagara yabo. Icy’ingenzi ni uko bagihumeka, ntabapfira gushira.

Kwihagararaho ntibireba abanyamashyaka gusa : ni igikorwa cya buri wese. Bisaba gukomeza umurego maze umuntu akanga igitugu. Nshimishijwe no kuba ku isonga ry’urwo rugamba.

Twiyemeje kwihagararaho

Nk’uko mubizi, twakomeje gusaba ko amatora ya Perezida wa Repubulika yigizwayo kugirango abashe gutegurwa mu mucyo, maze n’abakandida bapiganwe mu bwisanzure. Kugeza ubu byabaye gucurangira abahetsi. None rero reka tubivuge mbere y’igihe : ayo matora arafifitse, azavutsa Abanyarwanda uburenganzira bwabo bwo kwihitiramo abayobozi. Bene ayo si amatora : ni ukwikirigita ugaseka ! Ntituzemera ubutegetsi buzayaturukamo.

Dore nawe : abanyapolitiki n’abanyamakuru bakomeje gutabwa muri yombi, bagashyirwa ku ngoyi ndetse bakicwa ; ibinyamakuru bitavuga rumwe n’ubutegetsi bikomeje gufungwa ; iterabwoba n’ingoyi ku batavuga rumwe na Leta bigenda birushaho kwiyongera ndetse ubutegetsi bw’igitugu bugakomeza kuvutsa Abanyarwanda uburenganzira bwabo. Ayo ni amatora nyabaki ?

Nk’uko nabivuze nkigera mu Rwanda, ibikorwa byanjye bya politiki ntibizarangirira ku matora. Reka da ! Ibyo ngenda mbona ahubwo bituma ndushaho gukaza umurego.

Banyarwanda, Banyarwandakazi namwe mwese bakunzi b’u Rwanda, nimukanguke. Nongeye gusaba kandi ibihugu byose bikunda u Rwanda ngo bitarutererana mu maboko y’agatsiko k’abashaka kuruyobora nk’akarima kabo.

Mu bwitonzi ariko nta mususu, tuzakomeza duhangane n’iterabwoba ry’ingoma ya Jenerali Paul Kagame. Kandi rero sinshidikanya ko tuzatsinda umugambi mubisha wo kudushyira ku ngoyi no kudukandamiza. Tuzatsinda ubutiriganya bukomeje kuduharabika, badutwerera ibyaha tutigeze dukora ngo bakunde babone uburyo batwigizayo muri politiki. Tuzatsinda ubucakura bwo kudutatanya ngo bakunde babone uburyo badutsinda. Twanze abitwaza amateka bicurira ngo batwime ubwisanzure bwacu.

Abanyarwanda n’Abanyarwandakazi barashaka ubusabane nyakuri. Ntibifuza na gato kubeshyana ku mahano yabagwiririye, ahubwo barashaka kubwizanya ukuri barebana mu maso. Barashaka kurwanya umuco mubi wo gushyira ku ruhande igice kimwe cy’Abanyarwanda. Reka rero tubashakire uburyo babigeraho. Ni uburenganzira bwabo, ni uburenganzira bwacu ndetse n’ubw’abazadukomokaho.

Ndagira ngo mwese mubizirikane : mwabyandika mu kiganza, mwabifata mu mutwe, mwabigumana mu mutima, mwabizirikana se mu bikorwa byanyu bya buri munsi, ahantu hose n’igihe cyose :
“Niyemeje kwihagararaho mparanira ukubaho kwiza kw’abatuye urwatubyaye”.

Buri wese muri twe, akurikije ubushobozi bwe, afite uruhare mu guhindura imitegekere y’igihugu cyacu twifuza twese. Igisigaye ni ubutwari bwo guhamya icyo cyifuzo no kugiharanira muri kino gihe.

None rero Banyarwanda, Banyarwandakazi, nimuze, twese, duharanire iryo hinduka turwanya ubutegetsi bw’igitugu. Turwanye ririya kinamico, iriya ngirwa matora n’ibizayavamo byose. Igihe kirageze.

Imana ibarinde!

Victoire INGABIRE UMUHOZA
Umuyobozi wa FDU INKINGI
20 Nyakanga 2010.

– Niba ushaka kwohererezwa emails z’ibyandikwa kuri Rwandinfo mu Kinyarwanda, kanda hano.
– Niba ushaka kujya usomera inyandiko zo kuri Rwandinfo mu Kinyarwanda ukoresheje RSS Reader yawe, kanda hano.

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Comments

  1. Patty says:

    Ibi muri kwandika ni uburyo bwo gushaka kuvutsa umudendezo abaturage b’u Rwanda twifitiye, Abo bari hanze bagiye bahunga kubera ibyo bakoze by’amafuti nko guhungabanya umutekano, umutungo w’abaturage bitwaje ibyo bari byo ariko natwe rubanda rugufi turabizi; Abanyarwanda bitoreye uwo bashaka ko azabayobora kandi niko byagenze, ibikorwa bye nibyo bigaragaza ko abanyarwanda bazi gushishoza. Abanyarwanda ntibazigere bakunda umuntu nk’uyu ugirwa n’amagambo gusa, ushaka kubaroha mu macakubiri, ahubwo bahaguruke bafatanye n’ubuyobozi bw’inyamibwa budahwema kubagezaho ibyo bwatorewe. Mureke twebwe abanyarwanda nk’ababonye ibyabaye muri genocide y’abatutsi duhaguruke turwanye umwanzi uwo ari we wese washaka guhungabanya igihugu cyacu ndetse n’ushaka kuzana ibitekerezo bitubaka, ibisebanya, ivangura, Ba nyarwanda twese tube umwe twiyubakire igihugu cyacu mu mahoro no mu mudendezo, dushyire mu gaciro, twiheshe agaciro bityo tugere ku iterambere rirambye dufatanye n’ubuyobozi bwacu, ntitukabugore bityo tubafashe mu guhigura ibyo bahize mu mahoro nk’uko Nyakubahwa Perezida wa Repubulika Paul Kagame adahwema kubitugezaho. MURAKOZE MUGIRE AMAHORO Y’IMANA, MURABE MU MUDENDEZO UZIRA IKIBI, URUKUNDO RUBARANGE AHO MURI HOSE, MUHESHE IGIHUGU CYACU AGACIRO IMBERE Y’AMAHANGA, MUZAHORE MWIGIRWAHO, MURAGAHORA MWIFUZWA. MUSANGIRE BYOSE MWAMAGANE INDA NINI ZICIKE MURI IKI GIHUGU CYACU. MUZABA MUHINDUYE U RWANDA PARADIS. MURI INDATWA, INYAMIBWA MURI ABAGABO KU RUGAMBA. MURAKOZE.

  2. Grace says:

    Mugire amahoro y’Imana,birababaje cyane kuba mugicishaho inkuru nkizi,zituma abanyarwanda bacika umugongo,muge mugerageza kuduha amakuru yubaka,ashishikaliza abanyarwanda umulimo,twibuke aho twavuye naho tugeze ubungubu,kugera no mucyaro.ubundi ibikorwa bizivugire.
    ahubwo mbagire inama politike nziza nimuyitwerekeshe ibikorwa,kuko kugeza ubu abanyarwanda dutora ibikorwa ntidutora umuntu.
    murakoze kandi nshimire igihe kumakuru meza mujya mutugezaho kandi kugihe.

  3. Bebeto says:

    BIRABABAJE KO UMUNYAPOLITIKI AGIRA IMVUGO NK’IYI. ESE RUBANDA YIYITA KO AVUGIRA NI IYIHE?? NIZERE KO ATARI ABAHUTU KUKO NJYE SINIGEZE MUTUMA KUMVUGIRA. NI AMACO Y’INDA.

Speak Your Mind

*