Guhanga amaso amahanga ni ukwihenda
U Rwanda Ruzubakwa n'Amaboko y'Abana Barwo Bose

Guhanga amaso amahanga ni ukwihenda

Amatora aherutse mu Rwanda yagaragaje ko Kagame yiyamamaje atagira abo bahanganye koko.
Abanyarwanda bose, ndetse n’abanyamahanga, babonye uko byagenze:
● nta bwisanzure buhari ku bakora politiki,
● amashyaka atavuga rumwe na Leta yakomeje gushyirwaho amananiza ndetse n’iterabwoba, akomeza kwangirwa kwiyandikisha ngo azagire uruhare mu matora wa Perezida wa Republika.
● abagaragaje ko batavuga rumwe baratotejwe, barafungwa ndetse bamwe baricwa
Mu by’ukuri birazwi, FPR ni ryo shyaka ryonyine rikorera mu bwisanzure mu Rwanda. Kugira ngo yerekane ko mu Rwanda hari amashyaka menshi, FPR yashyizeho ihuriro ry’amashyaka maze irariyobora rihinduka nk’ishyaka rimwe, rigendera ku bitekerezo byayo. Nta munyamurwanda n’umwe utazi ko ayo mashyaka ari udukingirizo.

Muri iki gihe, ntushobora kunenga imikorere ya FPR ngo ugire amahoro cyangwa wemererwe gukorera mu Rwanda. Ibyo byagaragaye igihe bafungaga itangazamakuru ryigenga, igihe bafungaga umunyamerika w’umunyamategeko wari uje kwunganira Victoire Ingabire, ndetse n’igihe birukanaga abaharaniranira uburenganzira bw’ikiremwa muntu.

Ubu Kagame yishyize mu mutuzo, ngo abanyarwanda bamuhaye indi manda y’imyaka 7 yo gutegeka u Rwanda. Icyumweru kimwe ntikiranarangira ariko biragaragara ko ubukana bw’abamushyiraga mu majwi mbere y’amatora bwagabanutse. Ministiri Mushikiwabo yivugiye inshuro nyinshi agira ati : ‘iyo nduru ni ijyana n’amatora ; ni ukwihangana gato, izahita ishira nyuma y’amatora’.

Ikibazo gisigaye ubu rero ni iki : abivovotaga bazakora iki ? bafite bushobozi ki bwo guhindura ibintu ?

Kimwe mu bishoboka ni uko bazakomeza guta igihe bivovotera aho bari, bandikirana ku rubuga rwa Internet rutanagerwaho n’abaturage bavugira, ariko gari ya moshi ya Kagame ikikomereza urugendo nta mususu. Erega burya Kagame ni inararibonye ! Yarivugiye ati ‘reka imbwa zimoke, ntibizatubuza gukomeza urugendo rwacu’.

Bamwe bashishikajwe no guhanga amaso amahanga, basa n’abafite icyizere ko ibihugu bikomeye hari icyo bizabamarira. Bahora bataka batakamba bandikira ONU, Obama, Cameron n’abandi bategetsi b’ibihugu bikomeye kw’isi, nk’aho bo bayobewe ibikorerwa mu Rwanda. Ibyo ni nko gusura mw’ivu. Kwizera amahanga ni ukutamenya cyangwa kwirengagiza uko politiki zikorwa.

Ese mwari mubizi ? Ku bwanjye, ibintu bizahindurwa n’abanyarwanda. Niba babona nta bushake buhagije cyangwa nta bushobozi bafite bwo kwishyiriraho ubutegetsi bashaka, nibashinyirize bemere ubwa Kagame, bakomeze bategekwe nk’ingaruzwamiheto.

– Niba ushaka kwohererezwa emails z’ibyandikwa kuri Rwandinfo mu Kinyarwanda, kanda hano.
– Niba ushaka kujya usomera inyandiko zo kuri Rwandinfo mu Kinyarwanda ukoresheje RSS Reader yawe, kanda hano.

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Comments

  1. Peter says:

    nshyigikiye ibyo uvuze rwose. Nta kamaro ko kwirirwa abantu basakuza. Amerika na GB sibyo bishyiraho cg bikouraho President mu Rwanda. Ubicungiraho afite ikibazo cy’imyumvire ya politics. Niba Kagame amaze gutorwa, ntakindi cyakorwa ni ugutegerza amatora ataha ya 2017. sorry but that is nhow it works.

  2. Fidel says:

    Ariko se bahera he bavuga ko kagame yiyamamaje ntawe bahanganye?None ariya mashyaka atemerewe niba afite imiziro batabanje gukosora n’amakosa ya Kagame cyangwa n’amakosa yayo mashyaka!Nibabanze bakosore amakosa yabo hanyuma babone gusakuza! Biriya ntaho bitaba muri iyi si yose!!!

Speak Your Mind

*