2012 January

Imihigo myiza abantu bifurizanya buri mwaka.

Bavandimwe mwese muri Kristo Yesu, kuva ku impera z’umwaka urangira kugera mu intangiro z’umushya utangiye,haba hari inyandiko nyinshi ndetse n’imvugo zitari nke hagati y’abantu n’abandi bifurizanya kwesa imihigo myiza mu bihe bikurikira icyo baba barimo. Ibyo biba hagati y’umuntu n’undi, hagati y’imiryango n’indi, hagati y’abaturanyi, mu mirimo se bakoramo … .

Imihigo myiza bifurizanya iri mu buryo bwinshi : Noheli Nziza n’Umwaka Mushya muhire mu byiza byinshi, nk’ubuzima bwiza n’ibindi …  .  Yego,ibyo koko niko abantu baba babitekereza kuko aba ari byo bashaka, ariko se koko ikizaba kiribube muri ibyo bivugwa ni ikihe?  Muri ibyo byose nta numwe uba azi ikizaba kuri we nkuko Ijambo ry’Imana ribitumenyesha. Nta numwe uzi uko ejo bizaba bimumereye. Narinda ibyo biba bisabwe ari iby’akanya gato kuko nyine bigenda bishirana n’ibihe.

None se ubwo bimeze bityo,aho abantu ntibari bakwiriye kwifurizanya ikintu cy’ingenzi, ari nacyo Yesu Kristo yahaye abigishwa be nkuko abivuga agira ati : ” Data,igihe kirageze,ubahiriza Umwana wawe,kugira ngo Umwana wawe na we akubahishe,nkuko wamuhaye ubutware ku kinyamubiri cyose,ugira ngo abo wamuhaye bose abahe ubugingo bw’iteka” ? (Yoh.17,1b-2).

Mbese mu by’ukuri “Ubugingo bw’iteka (buhoraho)sicyo kintu cy’ingenzi abantu bari bakwiriye kwifurizanya ndetse buri gihe nta gutegereza biriya bihe by’impera z’imyaka n’intangiro z’imishya ? Kandi ku murongo ukurikiyeho wa gatatu, Yesu yasobanuye neza uko ubwo bugingo bumeze butyo bubonwa agira ati :”Ubwo bugingo bw’iteka ni ukukumenya, wowe Mana imwe y’ukuri,no kumenya uwo watumye Yesu Kristo”(17,3).

Aho kwifurizanya rero iby’umubiri bigenda bishirana n’ibihe,atanazi ndetse ko byazaboneka nkuko babyifu za, abantu bari bakwiriye kwifurizanya ibyo bitazashira. Abantu bakifurizanya kumenya Imana Data n’Umwana wayo Yesu Kristo. Twibuke kandi ibyo Yesu uyu yivugiye ubwe ko ari we” Inzira ,Ukuri n’Ubugingo (14,6).  Nukuvuga ngo m’ukumenya Yesu uwo bijyana no kumwizera muri byose, tuba dufite byose. Erega kutamugira bituma duhorana inzara n’inyota y’ibintu bisanzwe kandi bishira. Ari na byo bituma abantu bamwe  bajya mu byo batagombaga kujyamo by’inzira zo kurimbuka. 

Mu intangiro z’uyu mwaka mushya wa 2012 nkaba mbifurije mwese uko kumenya tumaze kuvugaho. Kandi Imana imwe m’Ubutatu bwera ibahire mwese ku bw’Izina rya Yesu Kristo.Amen.