U Rwanda Ruzubakwa n'Amaboko y'Abana Barwo Bose

Urukiko Mpanabyaha ku Rwanda rwa Arusha (TPIR) rurasaba Leta y’u Rwanda kurekura Peter Erlinder

Kigali – Urukiko Mpanabyaha ku Rwanda rwa Arusha, rubigiriwemo inama na Loni, rwasabye Leta y’u Rwanda gufungura bidatinze avoka w’umunyamerika Peter Erlinder, wafatiwe i Kigali tariki 28 Gicurasi, akaba akurikiranweho icyaha cyo guhakana Jenoside yo mu 1994.

Urukiko rwa Arusha rurasanga ko byaje kugaragara ko ibyo avoka Erlinder aregwa ari ibyo yagiye atangaza mu rwego rw’imanza yaburaniraga be muri TPIR, nk’uko byatangajwe na juji mu rukiko i Kigali. Muri abo yaburaniraga harimo abasirikari bakuru b’ingabo z’u Rwanda, barimo Colonel Theoneste Bagosora na Major Aloys Ntabakuze.

Mu rwandiko yandikiye Minisitiri w’Ububanyi n’Amahanga Louise Mushikiwabo, umwanditsi mukuru w’urukiko rwa Arusha, Adama Dieng, yavuze ko ibiro bya Loni bishinzwe ibirebana n’amategeko byagiriye inama Urukiko rwa Arusha (TPIR) yo guhesha agaciro ubudahangarwa bwa Avoka Erlinder bidatinze no gusaba ifungurwa rye bidatinze.

Ubusanzwe abunganira abaregwa muri TPIR bafite ubudahangarwa mu gihe bakora imirimo y’urukiko mpuzamahanga.

Mu kiganiro yagiranye na radio BBC Gahuzamiryango, Umushinjacyaha Mukuru Martin Ngonga yatangaje ko iyi nyandiko ya TPIR ivuguruza ibyo urwo rukiko rwari rwaratangaje mbere aho rwavugaga ko rwumva neza ko ibyo Erlinder afungiye ntaho bihuriye n’urwo rukiko.

Yagize ati : «ndumva iki ari ikibazo tuzavugana nabo, urukiko rwa Arusha dukoranye igihe kirekire, nibatwemerera kuganira nabo tuzavugana nabo, gusa mu gihe tutaravugana, akazi k’inkiko kazakomeza».
Ngoga yatangaje ko mu nyandiko zikubiyemo ibyaha Erlinder aregwa hatigeze hifashishwa inyandiko n’imwe yo mu Rukiko rwa Arusha, uretse ko umucamanza w’urukiko rw’i Kigali yibeshye akabikomozaho.

Avoka Erlinder yatawe muri yombi kuri 28 Gicurasi i Kigali aho yari yaje kuburanira umukuru w’ishyaka FDU-Inkingi, Victoire Ingabire, uregwa gupfobya Jenoside yabereye mu Rwanda. Baramufashe bamurega nawe ibyo barega umukiriya yari yaje kuburanira.

– Niba ushaka kwohererezwa emails z’ibyandikwa kuri Rwandinfo mu Kinyarwanda, kanda hano.
– Niba ushaka kujya usomera inyandiko zo kuri Rwandinfo mu Kinyarwanda ukoresheje RSS Reader yawe, kanda hano.

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Speak Your Mind

*