Umwaka urashize Intwari Victoire Ingabire ashoje urugamba rwa demokarasi no guharanira ubusugire bwa muntu mu Rwanda
U Rwanda Ruzubakwa n'Amaboko y'Abana Barwo Bose

Umwaka urashize Intwari Victoire Ingabire ashoje urugamba rwa demokarasi no guharanira ubusugire bwa muntu mu Rwanda

par Eugène Ndahayo.

Bavandimwe dusangiye igihugu namwe nshuti z’u Rwanda,

Muribuka ko hari ku itariki ya 16 Mutarama 2010 ubwo Madamu Victoire Ingabire Umuhoza, Umuyobozi mukuru wa FDU-INKINGI, yapfukamye agahobera ubutaka bw’urwamubyaye yari amaze imyaka 16 adakandagiramo.

Umwaka wuzuye w’urugamba nyarwo rwo guharanira demokarasi, ukwishyira ukizana, uburenganzira bwo kubaho, kugira umutekano n’ubusugire bisesuye, uburenganzira bwo kwishyira hamwe, bwo kwisanzura, bwo gukora politiki, bwo kwagura urubuga rwa politiki ; muri make, uburenganzira bw’ibanze, bwanyonzwe n’ubutegetsi bw’igitugu cy’akataraboneka.

Amaze umwaka ahatana hamwen’abanyarwanda mu gihugu ngo hemezwe ko umubabaro w’abazize itsembabwoko n’ibindi bikorwa byibasiye inyoko muntu utibagirana cyangwa se ngo wibukwe igicagate, kuko bituma abanyarwanda batagira kivugira bahera mu gihirahiro.

Umwaka wo guharanira ko abantu bose bareshya, kugira ngo abana bose b’igihugu cyacu, u Rwanda, bashobore gusangira nta vangura ubukungu bw’igihugu, uburezi n’ubuvuzi bw’ibanze.

Umwaka urashize yamagana ubutabera bubogamye, butemerera uregwa kwihitiramo umuburanira no kuburanishwa mu gihe kitarambiranye. Ubwo butabera bukaba bwarimitse imikorere yo guca imanza udashingiye ku bimenyetso bifatika bise « gacaca », iyo gacaca ikaba yarafungishije abantu ibihumbi n’ibihumbi, birirwa mu mirimo y’uburetwa, abenshi bakaba nta n’icyizere ko igihano kizarangira ngo batahe mu rugo iwabo.

Umwaka uruzuye duharanira ko amahoro mu karere, amahoro twavukijwe  n’ubutegetsi bw’igitugu bwashoje intambara no mu bihugu duturanye cyane muri Congo, aho bumaze guhitana abaturage barenga miliyoni 5.

Abifashijwemo n’uduco tumwe na tumwe, ndetse n’itanganzamakuru ribogamye, byamugize igitangaza mu kazamura ubukungu bw’igihugu, Perezida w’u Rwanda Paulo KAGAME, yageze aho na we yiyumvamo ko ari ikinani muri politiki.

Ukugera mu Rwanda kwa Madamu Victoire Ingabire Umuhoza kwatumye ukuri ku miterere y’ubutegetsi buriho kujya ahagaragara : byaragaragaye ko ubutegetsi buriho ari ubw’ingoyi y’igitugu, bushingiye kw’irondakoko ritigeze riboneka mu mateka y’isi bwihariwe n’akazu, agatsiko k’abasirikare bahinduye  inzego zose z’ubutegetsi, iz’ubucamanza n’iz’imiryango idashingiye kuri Leta ingaruzwamuheto n’akarima kabo, babifashijwemo n’igipolisi gikorera umuntu umwe n’ikiguri cy’inzego  z’iperereza.

Mu gihe cy’umwaka, ubutegetsi bwarushijeho gukora amakosa menshi mu rwego rwa politiki n’amakosa akomeye mu bijyanye no kubahiriza uburenganziramuntu. Ay’ingenzi muri yo ni :

  • Iyicwa rya André Kagwa Rwisereka, wari visi-perezida w’ishyaka « Green Party », tariki ya 13/07/2010.
  • Iyicwa ry’umunyamakuru J.Léonard Rugambage wo mu kinyamakuru « Umuvugizi », tariki ya 24/06/2010.
  • Kugerageza kwica Jenerali Kayumba Nyamwasa tariki ya 19/06/2010
  • Kujya kwiba hanze umukuru w’ishyaka PDP-Imanzi Déogratias Mushayidi, hanyuma bakamufunga tariki ya 03/03/2010
  • Guta muri yombi umukuru w’ishyaka FDU-INKINGI Madamu Victoire Ingabire Umuhoza tariki ya 21/04/2010, hanyuma bakamurekura agafungishwa ijisho kugeza tariki ya 14/10/2010 aho yongeye gutabwa muri yombi agafungwa.
  • Gufunga umunyamategeko w’umunyamerika Prof. Peter Erlinder, wari waje kunganira Madamu Victoire Ingabire Umuhoza, hanyuma akaza gufungurwa by’agateganyo tariki ya 17/06/2010.
  • Gufunga Bwana Bernard Ntaganda, umukuru w’ishyaka PS-Imberakuri tariki ya 24/06/2010.
  • Itabwa muri yombi n’ifungwa ry’abanyamakuru Madamu Agnès Nkusi Uwimana na Madamu Saidati Mukakibibi, b’ikinyamakuru Umurabyo, ku matariki ya 8-10/07/2010.
  • Itabwa muri yombi n’ifungwa ry’abayobozi bagera ku icumi ba FDU-INKINGI na PS-IMBERAKURI tariki ya 24/06/2010, baje gufungurwa by’agateganyo,
  • Itabwa muri yombi n’ifungwa tariki ya 24/06/2010 rya Bwana Théogène Muhayeyezu, wunganiraga ishyaka FDU-INKINGI, waje kurekurwa nyuma y’iminsi 15.
  • Amatora y’Umukuru w’igihugu tariki ya 09/08/2010 yaheje amashyaka atavuga rumwe n’ubutegetsi
  • Ifungwa rya benshi mu bakuru b’ingabo z’u Rwanda : Jenerali Charles Muhire, Jenerali Majoro Karenzi Karake, Koloneli Rugigana Ngabo, etc.
  • Itangazwa rya raporo « Mapping » ya ONU tariki ya 01/10/2010 ku byaha byibasiye inyoko-muntu muri Congo byakozwe ahanini n’ingabo z’u Rwanda.

Nibyo koko, mu gihe kitageze ku mwaka, inyenyeri yari imurikiye uwiyitaga Rudasumbwa yatangiye kuzima ! Uwiyitaga cyangwa se uwo bitaga umuyobozi w’akataroneka muri Afrika yose asigaye ateye imbabazi gusa . Inyenyeri ntikibengerana ku buryo za guverinoma zahoraga zimusingiza ubu zitacyemera kugaragara mu ruhame hamwe na we..

Koko rero abambari b’ingoma ntibakibona ibisobanuro ku makosa akomeye akomeje gukorwa n’ubutegetsi. Ntibashobora gusobanura impamvu ubutegetsi buvuga ko burangwa na demokarasi bwanze kwemera amashyaka atavuga rumwe na bwo no kwemerera abayobozi bayo kwiyamamaza mu matora ya perezida wa Republika. Byongeye kandi, abakekaga ko ibyo kubona amajwi ijana ku ijana byarangiranye n’abasoviyeti barumiwe. Perezida wa Republika wari wongeye kwiyamamariza uwo mwanya yongeye kubona amajwi arenze ukwemera  nk’uko byari byaragenze mu matora yari aherutse muri 2003 !

Buhoro buhoro, bigenda bigaragara ko ukwiyongera kurambye kw’ubukungu kwabaye igitangaza kugeza ubu gushingiye gusa ku bikorwa by’ubwicanyi n’ubusumbane mu bantu. Ku ruhande rumwe, ibyo bishingiye ku maraso yamenetse y’inzirakarengane zigera kuri miliyoni 5 z’abanyekongo, bazize intambara igamije gusahura igihugu cy’abaturanyi. Ku rundi ruhande, bishingiye kw’inyunyuzwa ry’umutungo w’abanyarwanda 90% batuye mu cyaro, kugira ngo hatezwe imbere ubukungu bwa 10% by’abaturarwanda batuye imijyi. Twakongeraho kandi ikibazo gikomeye cy’isaranganya ry’ubukungu bw’igihugu, ONU yagaragaje ko 10% by’abakire bihariye umutungo urenga 50% by’ubukungu bw’igihugu mu gihe 50% by’abakennye cyane mu baturarwanda batunzwe n’umutungo batanabona na 10% by’umutungo w’igihugu.

Ngibyo ibyo Umuyobozi wacu yagezeho mu mwaka amaze ku rugamba, ngibyo ibyo ishyaka FDU-INKINGI ryagezeho, tukaba tubyishimiye kandi tunabishimira abadufasha muri uru rugamba rwo kwibohoza.

Umuyobozi wacu ari muri gereza kuva tariki ya 14/10/2010. Ku bashobora cyangwa se batangiye gucika intege, nimwibuke amagambo yatubwiye amaze iminsi mike asubiye mu gihugu :

« Nemera programe ya politiki nsangiye na bagenzi banjye mu ishyaka, nkunda igihugu cyanjye n’abagituye bose kandi nzi ko nshyigikiwe n’abasangirangendo n’Abanyarwanda bo mu byiciro byose, mu moko yose no mu ngeri zose. Ni imbaraga kandi ni n’igihango ntashobora gutatira. Sinzatezuka ku ntego niyemeje kuko nemereye bagenzi banjye duhuje urugamba rwa demokarasi ko nzayisohoza. Ndabizi kandi nabitekerejeho igihe kirekire, ko ubutegetsi bushobora kungendaho, kumfunga. Sinasoza ntababwiye ko niteguye kuzahangana n’ibibazo byose n’ingorane zose nzahura nazo kugeza igihe dutsindiye, nkuko nabisezeranyije bagenzi banjye, nkuko nabisezeranyije abanyarwanda. Ubutegetsi buramutse bumpitanye, ndabasabye, muzakomereze urugamba aho nzaba ndusubikiye. »

Muri gereza aho afungiye, Umuyobozi  wacu Victoire Ingabire, ntacika intege. Akomeje kugira umutima, imbaraga n’ukwizera bikomeye. Bidatewe n’uko, nk’inzirakarengane, atekereza ko ubucamanza buzashyira bukamurekura. Oya, ntabwo yemera ubucamanza bw’ingoma y’igitugu. Ibirego bidafite aho bishingiye no kuyobya abatangabuhamya ku buryo buteye isoni n’agahinda, gufata no gufunga abantu ku buryo butubahirije amategeko, biragaragaza bihagije ko nta kizere afitiye ubucamanza. Oya, Victoire Ingabire arakomeye kubera ko azi ko afungiwe politiki ali nayo izamufungura. Arakomeye kubera ko kugira ngo afungurwe, azi neza ko tuzashyira ingufu nyinshi mu bikorwa byo guharanira ukwishyira ukizana no kubyaza umusaruro imbuto z’impindura ya demokarasi yabibye.

Madamu Victoire Ingabire Umuhoza azi neza ko afunzwe kubera ubutegetsi bwitwaza ubucamanza kugira ngo bumuvane mu ruhando rw’abaharanira kuyobora igihugu. Ntabwo ari ubwo bucamanza bwamunzwe n’ingoma y’igitugu buzamubohora, ni ukuri k’urugamba rwa demokarasi aharanira kuzamubohora. Ni ibyo twemera nka gahunda yacu ya politiki, ni ubushobozi bwacu mu kuyobora ishyaka, ni ibikorwa byo guhuriza hamwe ingufu n’abandi banyarwanda baharanira ko ibintu bihinduka, ni n’uburyo tumuba hafi mu gusobanura gahunda yacu n’uburyo twumvikanisha ibibazo bya politiki igihugu cyacu gifite bizatuma asohoka mu munyururu.

Ukudatezuka kwacu, ukutava ku izima no gukomeza umurongo twiyemeje mu rugamba rwa politiki turimo, bizaca intege  bamwe mu banyamahanga bakomeje kuturwanya bigira abavugizi b’ingoma y’igitugu iriho ubu mu Rwanda. Nidushyira hamwe, tuzabohoza Umuyobozi mukuru wa FDU-INKINGI, bityo, tunabohorezeko Abanyarwanda bose.

Bikorewe i Buruseli, tariki ya 16 Mutarama 2011

Umukuru wa Komite Nshyigikirabikorwa bya FDU-INKINGI

Eugène NDAHAYO

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Speak Your Mind

*