Umunyeshuri wa Kaminuza Eugene Uwambajimana yiyahuye kubera kuvanwa ku rutonde rw’abafashwa na Leta
U Rwanda Ruzubakwa n'Amaboko y'Abana Barwo Bose

Umunyeshuri wa Kaminuza Eugene Uwambajimana yiyahuye kubera kuvanwa ku rutonde rw’abafashwa na Leta

par Habimana Rukundo

Umunyeshuri witwa Eugene Uwambajimana w’imyaka 20 wigaga mu mwaka wa kabiri mu Ishuri Rikuru Nderabarezi rya Kigali (KIE) yitaye mu kagozi kuwa 31 Mutarama. Intandaro yaba ari uko yakuwe ku rutonde rw’abazarihirwa na Leta muri uyu mwaka.

Tuvugana n’Umuyobozi w’Ihuriro ry’Abanyeshuri bo muri KIE (SUKIE), Francis Ntaganira yadutangarije ko bamenye inkuru y’urupfu rwe bihutira kubikurikirana ngo barebe niba koko ari umunyeshuri wabo, bajya kurebera mu buhurukiro bw’Ibitaro bya Polisi ku Kacyiru aho umurambo we wajyanywe, basanga koko uwo munyeshuri bamuzi.

Ubwo twavugana n’uwari ashinzwe kurera uwo musore kuri telefone unamubereye nyirarume, Athanase Niyomugabo, yatubwiye ko Eugene Uwambajimana ari imfumbyi kuko ababyeyi be bapfuye mu ntambara yo muri 1994 ubwo yari agifiye imyaka ibiri y’amavuko. Niyomugabo yatubwiye ko ariwe wasigaye arera nyakwigendera nyuma y’uko ababyeyi be bapfuye kugeza uyu munsi.

Nyirarume wa nyakwigendera yakomeje adusobanurira ko umwana akimara kubona buruse byamushimishije cyane kuko yari asigaye amufasha kubona amafaranga yo kwiyandikisha gusa ubundi amafaranga yahabwaga ya buruse akayifashisha gukemura utundi tubazo.

Si ubwa mbere yari yiyahuye…

Nk’uko twabitangarijwe na Niyomugabo, ngo mbere y’uko umwaka wa 2010 utangira yabonye akazi kure y’umujyi ku buryo atabashaga no kuvugana na Eugene kuri telefoni. Ngo ibyo byatumye uwo mwana yiheba cyane, ashaka kwiyahura ; kuburyo yananyweye aside (Acid) abaturanyi baramutabara bamuha amata arusimbuka atyo.

Ngo kubura amafaranga yo kwiyandikisha umwaka ushize byatumye uwo musore afata icyemezo cyo guhagarika kwiga (suspence) mu mwaka wa 2010. Niyomugabo akimenya ko uyu mwana yareraga yahagaritse amasomo yamuhaye ayo kwiyandikisha muri uyu mwaka wa 2011 nk’uko yakomeje abidutangariza.

Byose rero ngo bijya gutangira, uwo musore yageze ku ishuri asanga yakuwe ku rutonde rw’abazahabwa amafaranga 25000 leta yageneraga abanyeshuri barihirwa na leta, arushaho kwiheba.

Tumubajije niba akeka ko iyo yaba ariyo ntandaro yo kwiyahura kwa Uwambajimana, Niyomugabo yagize ati:”Ejo bundi yabwiye mugenzi we ko arambiwe kundushya, kuko ngo atiyumvishaga ukuntu nazajya mbona ibihumbi 60 byo gukoresha buri kintu akeneye.

N’ubwo umuntu atabasha gusoma mu mutima we ariko ndakeka ko yiyahuye kubera kubura ubufasha nyuma yo gukurwa kuri urwo rutonde kandi ariho yari yizeye”.

Eugene Uwambajimana yari atuye ku Gitega mu Mujyi wa Kigali, aho yari acumbitse mu nzu y’uyu Niyomugabo kuko nta handi yari kubona acumbika kubera ubushobozi buke. Yabanaga muri iyi nzu n’uwitwa Emmanuel Maniraguha wari ashinzwe kuyicunga.

Habuze ubushobozi bwo kumushyingura…

Tubajije Niyomugabo igihe bateganyiriza gushyingura umurambo wa nyakwigendera yadusubije mu ijwi ryuje agahinda ati: ”Twateganyaga kumushyingura ejo ariko ubushobozi bwabuze pe! Nitabaje no muri KIE, kubera ko uyu munsi ari konji ntibagira icyo bamarira”.

Yasoje atubwira ko ubushobozi nibuboneka nyakwigendera Eugene Uwambajimana azashyingurwa kuri uyu wa Gatatu, mu Karere ka Gisagara mu Ntara y’Amajyepfo aho uyu mwana akomoka.

Shaba Erick Bill

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Comments

  1. Kanyarwanda says:

    Biteye agahinda, kubona u Rwanda rwejo rugiye gushira kubera kwiheba kwejo hazaza kandi u Rwanda rwuzuye abantu birirwa biyemera ngo bakunda igihugu, gukunda igihugu menya haraho bihuriye no guhembwa za millions

    Birababaje.

  2. alfred says:

    birababaje kurupfu rwuwo mwana,ariko bagombye kureba ko ibikorwa ntabushishozi burambuye buteza ingaruka nyishi.nkubu hari umwana w’umukire uzwi mugace ntavuze….wasohotse mubazarihirirwa ayo mafaranga,ntanakimwe yarabuze,kandi ubu amaze kurangiza muri uyu mwaka ushize,barangije bamugarura ho ,anarangije,aba atwaye umwanaya wuwo mwana ,birababaje ibikorwa nabashishoze .ibyo byabaye muri kaminuza ya butare.

Speak Your Mind

*