Umunyamategeko Peter Erlinder aremeza ko azicwa naramuka agarutse mu Rwanda
U Rwanda Ruzubakwa n'Amaboko y'Abana Barwo Bose

Umunyamategeko Peter Erlinder aremeza ko azicwa naramuka agarutse mu Rwanda

Peter Erlinder igihe yari afungiwe i Kigali

Umushinjacyaha mukuru Martin Ngoga aherutse kuvuga ko umunyamategeko w’umunyamerika Peter Erlinder agiye kuzahamagarwa n’ubutabera bw’u Rwanda kugirango yisobanure ku byo aregwa, harimo gupfobya no guhakana Jenoside yakorewe abatutsi mu 1994. Yongeyeho ko naramuka yanze kugaruka mu Rwanda bizamenyeshwa Polisi Mpuzamahanga (Interpol) ikaba ariyo imufata, ngo kandi ibyo Erlinder nk’umunyamategeko asanzwe abizi.

Peter Erlinder yarekuwe by’agateganyo mu kwezi kwa Kamena uyu mwaka, ahabwa uburenganzira bwo kuba asubiye iwabo muri Leta Zunze ubumwe z’Amerika, ariko agasiga aho abarizwa mu Rwanda.

Mu kiganiro yagiranye na Associated Press kuri uyu wa gatanu, Peter Erlinder yavuze ko azi ko naramuka agarutse mu Rwanda kuburana mu rubanza rwe azicwa. Ibyo bihuye n’ibyo yatangarije i Nairobi akimara kurekurwa mu kwezi kwa Kamena, ubwo yavugaga ko ubutegetsi bw’u Rwanda bwari bwateganije kumushimuta no kumwica, akaza gukizwa n’uko yanze kugenda nta mudipolomate w’iwabo uhageze.

Hagati aho urukiko mpuzamahanga ku Rwanda (ICTR) rukorera Arusha muri Tanzaniya, aho Peter Erlinder yunganira abaregwa ibya jenoside y’abatutsi, rwavuze ko Erlinder ashobora gukurikiranwa ku byo akorera hanze y’urwo rukika ariko rusaba u Rwanda kutamukurikirana mu nkiko kubera ibyo yacukumbuye, yavuze cyangwa yanditse mu rwego rw’akazi ke muri ICTR.

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Speak Your Mind

*