Ubwicanyi Kagame yakoreye abahutu muri Congo nibushyirwe ahagaragara
U Rwanda Ruzubakwa n'Amaboko y'Abana Barwo Bose

Ubwicanyi Kagame yakoreye abahutu muri Congo nibushyirwe ahagaragara

par Faustin Twagiramungu.

Kuri iyi taliki ya 17 Nzeli 2010, imyigaragambyo yo guhakana ko abahutu b’impunzi, barenze 200.000 bapfuye bishwe n’ingabo za Kagame, uyu munsi yakorewe i Geneve m’Ubusuwisi, ahari icyicaro cya Komisariya ya LONI ishinzwe kurengera uburenaganzira bwa muntu. Ubwo kandi Kagame yavugiye ejo mu Bwongereza  ko atishe.

Biratangaje cyane kubona abantu bikora, bakava mu Rwanda ngo baje guhakana ko nta “jenoside” yakorewe abahutu mu mashyamba ya Congo kuva muri Nzeli 1996 kugeza muri Kanama 1997. Imirambo aho yajugunywe, uretse iyatawe mu migezi, harahari kandi harazwi. Abatangabuhamya b’Abanyekongo, barahari, Abanyarwanda barokotse barahari, amafoto yafashwe na za satellite z’Abanyamerika arahari. Abantu bararashwe hakoreshejwe imbunda, abandi bicishwa inyundo n’udufuni, bamwe baratwitswe, abandi bajugunywe mu migenzi, abandi imirambo yabo yajugunywe ku gasi iribwa n’inyamaswa zo mu ishyamba, indi irabora hasigara amagufa yanamye mu mashyamba, abandi bajugunywe mu byobo bicukuwe huti-huti.

Ibi ni ukuri kwambaye ubusa, none Perezida Kagame na Ministri Mushikiwabo, babishyigikiwemo n’imbohe z’abahutu bari mu nzego z’ubutegetsi, cyane abari mu ngabo za Kagame, nka Rwarakabije wabaye Rwabuzisoni, muri iyi minsi birirwa bakoma akamo aho banyuze hose, no ku ma radiyo na za TV, babeshya, ko nta “jenoside” yakorewe abahutu yabayeho. Mbese bemeza ko nta bahutu b’impuzi biciwe mu mashyamba ya Congo bazira ko ari abahutu! Abapfuye bose ngo bazize ko bari abicanyi!!

None se mu Rwanda ubwicanyi buzemezwa ko ari “jenoside” kubera ko bukozwe n’abahutu b’intagondwa, iyo bishe abatutsi bagamije kubatsemba? Nonese koko, LONI izemeza ko ubwicanyi nka buriya iyo bukorewe hanze y’u Rwanda bugakorwa n’abasirikare b’abatutsi bo mu ngabo za Kagame (uhakana mu kinyoma cye gisanzwe ko atari umututsi, ngo ni umunyarwanda gusa!), bagambiriye kwica abahutu, ko icyo gihe bititwa jenoside ngo kubera ko ari abahutu! Kubera izihe mpamvu bitakwitwa jenoside?

Ikiremwa muntu cyaba icy’i Buraya, cyangwa icyo muri Aziya, cyangwa se icyo muri Afrika, bose bafite amaraso amwe. Amaraso y’abatutsi n’amaraso y’abahutu yose aratukura. Uwabihakana yaba afite uburyo bwe yihariye bwo gusobanura ubwicanyi bwakorewe abahutu b’impunzi muri Congo.

Nyamara rero, kabone niyo LONI yahindura amagambo uko yanditswe muri cya cyegeranyo cyayo cyashyizwe ahagaragara imburagihe n’ikinyamakuru cy’Ubufaransa cyitwa Le Monde, tariki ya 27, Kanama 2010, ntabwo bizahindura ko  uburyo ubwicanyi bw’abahutu bwakozwemo ari umugambi wa Kagame. Uburyo ubwicanyi bwakozwe ku mpunzi z’abahutu birerekana ko hakozwe “jenoside”. Ibinyamakuru bimwe nka “Jeune Afrique”  byariye kuri “bangaheza” ya FPR, bitangiye kwandika amahomvu bihakana ko ubwo bwicanyi atari jenoside, ariko ntacyo bizahindura ku byemezo Abanyarwanda ubwabo bazafata , bo bazi neza ko ubwicanyi bakorewe  ari “jenoside”.

Kugira ngo iperereza ryakozwe kuri ubu bwicanyi rizasubizwe inyuma, rivuga ko Kagame atari umwicanyi, bikaba nyuma y’amatora yibyemo amajwi ku buryo bugaragara, bizaba bibaye kongera  kumuha indi ntsinzi. Azaba yongeye gutsinda indi ntambara.

Kagame ubwe yivugiye ko abahutu banze gutaha yabarashe. None se ubu abihakana ashingiye kuki? Ku gasuzuguro gusa.

1. Kagame yishe abantu benshi muri Byumba na Ruhengeri, Major Furuma bakoranye arabimuhamya, Kagame akabihakana;

2. Kagame yishe abaperezida babiri, Perezida Habyarimana w’u Rwanda na Perezida w’u Burundi, Cypriano Ntaryamira, Juge Jean-Louis Bruguiere arabimushija, n’Abanyarwanda benshi niko tubizi, na Major Furuma arabimuhamya, Kagame arabihakana;

3. Kagame yishe abahutu bavanywe mu byabo n’intambara, abicira ahitwa i Kkibeho, mucyahoze ari Gikongoro, abasirikare bakoranye uwo umugambi wo kubica nibo babimuhamya, ariko Kagame arabihakana;

4. Kagame yishe abanyapolitike mu Rwanda, barimo uwo twagiraga ngo ni inshuti ye, Seth Sendashonga; Ruzibiza, Furuma na Karegeya barabyemeza ko ari we wamwishe, ariko Kagame akabihakana;

5. Kagame yicishe Abepisikopi bo mu Rwanda barimo na Arkiepiskopi wa Kigali, hamwe n’abapadri icumi, biciwe ahitwa Igakurazo ho muri Gitarama, Major Furuma arabimuhamya, Kagame akabihakana;

6. Kagame yishe Abapadri b’Abanyarrwanda, barimo Abapadri bo muri Seminari ya Rwesero, kimwe n’uko yishe Abihayimana barimo Abapadri b’abanyamahanga babaga mu Rwanda: Abespanyolo, Abanyakanada, n’abafurere barimo umufurere w’umumariste wo muri Irlande. Reka twibutse ko Abespanyolo bamureze, kandi icyaha bamurega kikamuhama, ndetse akaba agomba gufatwa agashyikirizwa inkiko, gusa agakizwa no kuba umukuru w’igihugu, ariko Kagame arabihakana;

7. Kagame yicishije Musenyeri Nikwigize Phocas wa Ruhengeri ahungutse, yicisha Munsenyeri Munzihirwa n’uwamusimbuye Munsenyeri Katali, bombi b’i Bukavu muri Kivu yepfo, muri Congo, ariko arabihakana,

8. Kagame yicishe Abahutu b’impunzi barenga ibihumbi 200.000, LONI ubu niyo imushinja, ariko arabihakana;

9. Kagame yicishije abantu 18.000 n’amagana muri prefegitura ya Gitarama, ibimenyetso simusiga turabifite, ariko Kagame arabihakana;

Guhakana ibyaha yakoze sibyo byamugira umwere. LONI ntabwo yakomeza kogeza no kurata umuntu w’umwicanyi nka Perezida Kagame, agomba gukorerwa “mandat”, agafatwa agashyikirizwa inkiko;

Ubundi Abanyarwanda aho bari hose ntibagombye gutegereza ibyo LONI izakora, bagombye kujya mu mihanda, bakajya na NEW YORK kwiyama agasuzuguro ka Perezida Kagame atarajya kwishongora ku bahutu yiciye mu mashyamba imbere y’inteko y’amahanga.

Igihe kirageze, ko Abanyarwanda badafatwa nk’inyamaswa.

Kwiyunga nyabyo bizaza ari uko duciye agasuzuguro, tukiyemeza ubwubahane.

Bikorewe i Bruxelles, kw’itariki ya 17 Nzeli, 2010

Faustin Twagiramungu
Wahoze ari Ministri w’Intebe mu Rwanda.
Telefone: 00 32 473 210 512.

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Comments

  1. kuku kouate says:

    Aho bigeze, nte nubwo twemera ibyo bashingiyeho badefinissa genocide imariye abantu mu magereza, ahubwo genocide nyanyo iragaragaye, yujuje ibya ngombwa. Ibaruwa ya Kagame yandikiye Bagaza yerekanye ko bishe abatutsi nkurutindo rubajyana muri Kongo, bityo rero bararuma bagahuha, byose biri mu mugambi wo kumarira abahutu ku icumu, abiscishe ifuni n’inyuguti muri gacaca. i butare campus nubu ndabareba…

  2. alphonse says:

    Nyakubahwa Twagiramungu sibyo gusa ibyakorewe muli commune ya ya Mtura na Rwerere na Rubavu yo Mmuli Gisenyi birenze ukwemera njye ndavuga ibyo noboneye .Hali kuwa gatanu ubwo isoko rya hitwa Mahoko hafi ya Nyundo aho umusilikali wa Kagame wohejuru yafashe Blinder akohereza urufaya rwa masasu mu isiko ntihagire numwe urokoka , sibyo gusa hali bataillon yitwaga twenty first y ‘inkotanyi ali nayo yamaze abaturage bayo ma communes Kagame ubwe yabonye iyo batillon ikabije arayihagarika ayivanga muyandi ma bataillon kuko yabonaga yakabije akarere nt muturage ukihirangwa , sibyo gusa aho uwitwa Barengayabo Ramadhani wali Bourgmestre wa commune ya Rwerere aho yahamagaje inama y’abaturage akazana n’abasilikali ngo nabo kubacungira umutekano bakagota abaturage bose bakabaminjamo amasasu ntihagire numwe usigara wo kubara inkuru .
    Dusubire muli congo gato aho Inkambi yitwaga Gatare mu majyaruguru ya Goma aho inyenzi zayiteraga abaturage baguhira muli ryo shyamba bashaka guhungira mu nkambi Ya Mugunga bagasanga inkotanyi zabategeye muliryo shyamba likica uwitwa umugabo wese nku rugero hali umuhungu wali umwanditsi mu kinyamakuru Kangura witwaga Rubera Papias yiciwe muliryo shyamaba ushaka kumenya ukuli yakwegera umudamu we ubu yigisha I Busasamana aho muli Rwerere n’ahandi n’ahandi none ngo nitiyishe akihanukira ngo ashwi .
    Ese inkambi ya Nyacyonga yashiriweho iki umva ko ali malayika kandi ali SHITANI tuzakomeza nibiba ngombwa.

  3. NEZA says:

    Biteye isoni n`agahinda kubona imibare itangwa ikiri ku 200 000 kandi bizwi neza ko abahutu batsembwe izuba riva.
    Kagame azasobanurire abanyarwanda niba icyari secteur KABONA muri COMMUNE Rusatira nta baturage babarizwagamo.
    None se imirambo yuzuye mu misarane no mu miringoti ndetse n`indi yatwikiwe mu mazu y`abavandimwe bacu yadusobanurira niba ari INYAMASWA YICAGA dore ko nazo zidakwiye kwicwa urubozo.

    Uwo mugabo yakoresheje abasirikare be batumiza inama muri ISAR SONGA maze si UKUTWICA barinigura.Ntibarekeye aho kuko baduteye no mu ngo bagahumba abatitabiriye inama.
    Kuki se babanzaga kurobanuramo ABATUTSI mbere yo kudukubita amafuni. Ndavuga ibyo niboneye kuko n`
    urutonde rw`amazina y`abishwe rurahari ndetse n`ibyobo barimo ntaho byagiye nimubitwemerera tuzabishyira kumugaragaro gusa n`uko bazasibanganya ibimenyetso.

  4. Ntwari says:

    Turashimira cyane Bwana Twagiramungu Faustin ku bitekerezo ageza ku banyarwanda. Mu nyandiko ze no mu biganiro atanga, agaragaza ko adashyigikiye namba ubutegetsi bw’abicanyi! Iyi ni imyumvire yagombye kuranga abanyarwanda bose muri bwa “bunyangamugayo” bwagombye kubaranga.
    Bwana Twagiramungu aragaraza neza ubwicanyi bwa kagame na guverinoma ye; uhereye ku bwo yakoze mbere y’uko FPR igera ku butegetsi ukanyura ku bw’indengakamere bwakorewe muri RDC (bukorewe abahutu), ubwicanyi arimo aregwa na Raporo ya LONI, kugeza kubwo akomeje gokora ubu akorera abanyepolitiki batavuga rumwe nawe.
    Ariko rero Nyakubahwa Twagiramungu, twe urubyiruko ntitwabura kukubwiirako dutewe urujijo n’ibyo uvuga, atari uko uvuga ibinyoma, ahubwo bittewe n’icyo wabayecyo kugeza ubu. Ese Nyakubahwa, muzasubiza iki urubyiruko rutari ruhugukiwe n’ibintu bya politiki mu myaka ya 1990 na 1994, none ubu rutangiye gufungura amaso kuri politiki rwumvako mwaba mwaragize uruhare rukomeye mu gushyira iriya nyoko y’abicanyi ku butegetsi? Muti ni amagambo (urubyiruko ntitubisobanukiye)! Icyo tuzi kandi namwe mukunda kuvuga ni uko mwabaye ministiri w’intebe w’iriya ngoma y’igitugu! Ese mwemera kuba chef wa guverinoma mwaba mwari muyobewe icyo izo nkozizikibi zari zimaze gukora? Oya! Iyi nyandiko yanyu itwereka ko mwari mubizi neza! Abepiskopi, abafureri, abanyabyumba, abanyaruhengeri, … si abanyuma ya 1994. Ese ko abanyarwanda bamwe kandi batari bake (njye ntarimo kuko ntazi neza ukuri) bavuga ko mwagambaniye igihugu, aho none inzira muri ntiyaba ariyo kwicuza no gusaba abanyarwanda imbabazi? Yewe nubu nandika nahoze mbakurikira kuri BBC Gahuzamiryango muvugako ingoma ya Habyarimana itateguye jenoside! Ndakeka muraza no kuvuga ko mwayirenganyaga!
    Icyakora ibyo mukora njye ndabishima, kuko aho abanyarwanda tugeze niko twakwirahamwe, tukemera ko twahemukiranye maze tugasabana imbabazi nti buryarya. Maze tukiyubakira igihugu cyacu.
    Murakoze, mbifurije gukomeza urugamba rwiza mwatangiye!

  5. kkkoku kouate says:

    ibyo muvuga byose ni ukuri. ariko mumenye ko mushinja mwene wacu kandi umuyobozi dukunda. mumugire inama yo kwihana, arokoke, naho ubundi muragumya kumwongerera agahinda. arakabaho umwana wa mukecuru.

  6. ndayambaje says:

    nyakubahwa twagiramungu ndashaka kukumenyesha ko iyo myunvire ita jyanye nigihe tugezemo mubyukuri kurubu turarwana nubucyene ntabwo turabo guhora mu matiku ibyo dushaka n’ ibyubaka igihugu.

  7. Maneno Meno says:

    Abahutu ibyanyu turabizi, si mwese ariko mwuzuyemo abicanyi
    Mwari mubizi?

  8. Maneno Meno says:

    Murabeho ariko se mwisubireho

  9. Jule WANYOTA says:

    UMVA NJYE NKUBONA NK’INTWALI IZAZANA IMPINDUKA KU RWANDA coulage icya kunyereka ngo nguhe amakuru ababaje kuruta ho bibera muri iki gihugu.

  10. NGAGI says:

    mwese murapfa ubusa nimureke abazi ikibuga bakine mureke ubwo bugambo bw’icumi icumi.

Speak Your Mind

*