Ubushobozi bwo guha abanyeshuri inguzanyo ya buruse sibwo bubuze
U Rwanda Ruzubakwa n'Amaboko y'Abana Barwo Bose

Ubushobozi bwo guha abanyeshuri inguzanyo ya buruse sibwo bubuze

par Joseph Ngarambe

Kagame aretse gusahura no gusesagura, abanyeshuri bose basubizwa inguzanyo ya buruse netse bakanongezwa.

Uyu mwaka w’2011 watangiye nabi cyane ku banyeshuri benshi ba za Kaminuza n’amashuri makuru. Kandi ibyo byari byitezwe, nyuma y’uko Leta ya Kagame itangaje ikurwaho ry’inguzanyo ya buruse, ku buryo butunguranye. Mu mwaka ushize, iyo nguzanyo yagenerwaga abanyeshuri 24 098 (Imvaho Nshya, 2 Ukwakira 2010).  Uwo ukaba wari umubare munini, ukurikije ko Kaminuza n’amashuri makuru byigwagamo n’abanyeshuri ibihumbi 27 (Murigande, Izuba rirashe, 5 Ukwakira 2010).

Nubwo ngo 6210 baje kuyisubizwa (BBC Gahuza, 11 Werurwe), amarira n’imiborogo ni menshi kubayikuriweho, kimwe no kubatangiye amashuli imaze gukurwaho. Kandi bizwi ko benshi mu banyeshuli bahabwaga inguzanyo ya buruse, baturukaga mu miryango itifashije.

Iyo nguzanyo yabarirwaga ku manyarwanda ibihumbi makumyi abiri na bitanu  ku mwaka (25 000 ku kwezi), abanyeshuri bari bamaze imyaka basaba ko yakongerwa, kubera ko itari ikijyanye n’ibihe bihenze by’ubu. Igisubizo cya Leta cyo kuyikuraho burundu cyashenguye rero benshi, nubwo ubwoba bukibazitira, bubabuza kubyerekana uko bikwiye.

Icyo cyemezo cyo gukuraho inguzanyo ya buruse, ngo ntikireba kandi abanyeshuri bigira hanze y’u Rwanda. Umuntu akaba yabibonamo gutsimbataza ubusumbane bwari bunamaze kurenga urugero mu mateka ya Repubulika y’u Rwanda. Biragoye rwose kubibona ukundi, mu gihe abiga hanze akenshi babikesha amasano bafitanye n’abategetsi.

Abanyarwanda benshi batunguwe n’icyemezo bigaragara ko kije ari nk’inyongera-busumbane. Yemwe n’abari imbere mu gihugu, bagerageje gutsinda ubwoba baterwa n’igitugu cya Kagame, basobanura ko ingaruka z’icyo cyemezo zitazatinda kwigaragaza.

Ingaruka mbi z’icyemezo kigayitse

Nko kuwambere tariki ya 31 muri uko kwezi kwa Mutarama, Eugene Uwambajimana, umunyeshuli w’impfubyi wigaga mu mwaka wa kabiri muri Kigali Institute of Education (KIE) yariyahuye. Bagenzi be n’uwamureraga, bemeza ko icyo cyemezo cyo kwiyambura ubuzima cyaturutse ku kwiheba, amaze gusanga yarakuwe ku rutonde rwa bacye bashoboye gusigarana iyo nguzanyo.

Nyuma yaho gato, kuwa gatatu tariki ya 2 Gashyantare, umunyeshuli wo muri Kaminuza Nkuru y’ U Rwanda yikubise hasi, ajyanwa mu bitaro,  iyo mpanuka ikaba yari yatewe no kumara iminsi itatu atarya.

Abanyeshuri bakishuswa bajya kwiga, abenshi nabo ntibizeye kuzakomeza. Impungenge za bamwe muri bo ziherutse kumvikanira mu nkuru ya kabiri ya BBC Gahuzamiryango yo kuwa gatanu, tariki ya 11 Werurwe.  Umunyamakuru w’iyo radiyo yegereye abanyeshuri bo muri Kaminuza y’i Butare, bamutekerereza imibereho yabo iteye agahinda, nyuma yo kwamburwa iyo nguzanyo. Uwo munyamakuru kandi na we yarabyiboneye.  Ibyo ndetse byaje no gushimangirwa n’umwe mu bategetsi b’iyo Kaminuza. Umunyeshuri ugize imana, abona ayo kurira rimwe gusa ku munsi.

Mu ngorwa z’abanyeshuri uwo munyamakuru yasuye, yasanze harimo iziriho  zirira indya ituzuye, kw’isahani itukura ya Mironko. Iyo ndya iteye impungenge, abo banyeshuri bayifatiraga i Tumba, mu nkengero za Kaminuza, mu gisa na resitora. Iyo ngirwa resitora, abanyeshuri bayiriramo bayihimbye ‘Kill me quick’ (Nyica vuba), kubera isuku nkeya ibaviramo inzoka zo mu nda n’izindi ngaruka.

Imvugo y’abo banyeshuri bagihanyanyaza, yuzuyemo ububabare no kwiheba birenze urugero. Kandi nubwo ministeri y’Uburezi iriho ngo yiga ikibazo cyabo, umunyamakuru wa BBC yarangije inkuru yemeza ko abenshi muri bo badafite amahirwe yo kuziyongera ku rutonde rw’abanyeshuri 6210 bayemerewe.

Icyemezo kinyuranye n’intego z’Icyerekezo cya 2020

Biratangaje cyane kubona Leta y’u Rwanda ifata nabi abanyeshuri, mu gihe irata hose ko ari intangarugero mu burezi, ngo ikurikije Icyerekezo 2020, ngo kigamije ubukungu bushingiye mbere ya byose ku bumenyi.

Nibutse ko ubushobozi n’ubumenyi bigize imwe mu nkingi 6 z’Icyerekezo 2020 cy’u Rwanda. Ku mwanya wa kabiri w’izo nkingi z’Icyerekezo 2020, handitse ibi: “Iterambere ry’ubukungu bushingiye ku bantu bafite ubushobozi no ku bumenyi”.

Mu gusobanura uruhare rw’iyo nkingi y’iterambere, Icyerekezo 2020, kigera ku burezi kikagira kiti: “U Rwanda rwiyemeje kugera ku ‘Burezi bwa bose’, iyi ikaba ari imwe mu ntego zikomeye z’iterambere ry’ikinyagihumbi. Nyamara, hakenewe bigaragara kwigisha no guhugura abaturage ku nzego zose: amashuri abanza, ayisumbuye n’amakuru na za Kaminuza; by’umwihariko hakazirikanwa ku gaciro k’inyigisho zitangwa”.

Ni gute rero abanyeshuri batarya, batanafite amafaranga yo kugura ibikoresho bya ngombwa bakwiga bakamenya? Gukuriraho abanyeshuri inguzanyo ya buruse, ntibizahaza gusa iyo nkingi y’Icyerekezo 2020, iza ku mwanya wa kabiri. Binanyuranije kandi n’ikingi yambere y’icyo Cyerekezo, ari yo: “Ubuyobozi bwiza na Leta ifite ubushobozi”

Mu mwanya wo gukuraho inguzanyo ya buruse, ubuyobozi bwiza bwari kurwanya gusahura no gusesagura

Icyemezo cyo gukuraho inguzanyo ya buruse cyashyizweho ku buryo bw’igitugu buranga ingoma ya Kagame. Iyo haza kubaho ubuyobozi bwiza, na Leta koko ifite ubushobozi, inzego zayo zari kwibutsa Kagame  kudakora ishyano, mu kugabanya amahirwe yo kwiga ku banyeshuri bava mu miryango ikennye, cyangwa ikeneshejwe.

Icyemezo gishenguye abo banyeshuli n’abo bakomokaho, mu mpande zose z’u Rwanda, kiragayitse ku buryo bwose. Ntabwo kinakwiye kwihanganirwa, cyane cyane ko bimaze kugaragarira buri wese ko Kagame asahura cyangwa asesagura umutungo w’igihugu. Kandi rero, uko imyaka ihita, ni nako ingeso yo gusahura no gusesagura ikura ku buryo buteye inkeke.

Ni gute abakunda u Rwanda n’Abanyarwanda bahatira ingoma ya Kagame gucika ku ngeso yo gusahura no gusesagura

Mu gihugu gitegetswe neza, Kagame yagombye kugarura amafaranga y’Abanyarwanda yasahuriye mu mabanki yo hanze

Dufateho urugero ariya $73,688,408.09  yasahuriye hanze, akoresheje Musoni James na Nshuti Manasseh, mu gihe gito (Umuvugizi 2011-02-07). Uyavunjemo amanyarwanda, angana na 44 213 045 340. Kubera ko inguzanyo ya buruse ku mwaka ari Frw 250 000, ni ukuvuga ko iryo sahu ryakwishyurira abanyeshuri 176 852 uwaka wose. Bisobanura ko ayo mafaranga yakwishyurira byibuze imyaka 7 bariya banyeshuri 24 098 bose hamwe.

Kagame yagombye no kuvana mu buhisho buhenze  indege ebyeri  na zo zihenze, kandi zanavuye mu mafaranga yanyereje.

Kagame, agatsiko ke n’abamufasha kubeshya ntibahwema kwivuga ibigwi mu micungire myiza y’ibya rubanda. Byo kujijisha, kubera ko bimaze kumenyekana ko, mu bintu byinshi Kagame  yasahuriye hanze, harimo indege ebyiri zo mu rwego rw’abakire bagashize. Izo ndege rwose ziri mu rwego rutajyanye n’ubukene bw’u Rwanda zatanzweho zombi amamiliyoni agera kuri 130 y’amadolari ya Amerika ( ku giciro cyazo gisanzwe, hongeweho  milioni 30 zo kuzambika anti-missiles n’ibindi).

Ubukene bw’u Rwanda bwagombye kubwiriza Kagame kugurisha wenda indege imwe. Tuyihaye nk’agaciro ka miliyoni 30 z’amanyamerika, yagurishwa miliyari 18 z’amanyarwanda, ahwanye na buruse z’umwaka wose ku banyeshuri 72 000. Kubera ko abishyurirwaga buruse bose hamwe bari 24 096, bisobanura ko amafaranga yava mw’igurishwa ry’indege imwe yabishyurira imyaka hafi 3.

Guhisha izo ndege kandi bihenda Leta y’u Rwanda. Iyo Kagame agomba gukora urugendo, uko rungana kose, indege ihaguruka Athens, yamugarura igasubira Athens na none. Ibyo bisobanura ko, kuva aho ihishe inasubiramo, bitwara ubwabyo amasaha 11 n’iminota 30. Tubaze ko mu kwezi, Kagame agenda nka kabiri,  ibyo bivuze ko ku mwaka, ubwihisho bwo mu Bugereki buhombya u Rwanda amasaha 276.

Kubera ko Kagame yiyongeje igiciro, akakivana ku madolari ya Amerika 8500 kw’isaha, akagishyira ku madolari 10 000, ibyo bibyarira ingengo y’imari y’Igihugu igihombo cy’amadolari 2 760 000, avunje amanyarwanda miliyari 1 na miliyoni 656, ayo akaba yatuma abanyeshuli 6 624 babona inguzanyo ya buruse y’umwaka.

Igice cya Mbere

Umusomyi, Joseph Ngarambe

[Umuvugizi]

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Comments

  1. Ismail says:

    ariko se koko nibyo izi ndege ni iza perezida wacu? Njye nkeka ko bamubeshyera, really. However, niba ari ize koko, sinumva impamvu tugitanga imisoro!

  2. Lee Jullius says:

    Jjewe mbona biriya uyu ngarambeahora avuga kuri Kagame ari ibigambo bivanze n’ubugome ndetse n’urwango amwanga !Cyane cyane ibyaziriya ndege ahora azana byaramushegeshe ku buryo natareba neza bizamuhahamura agata umutwe abeshya ngo aravuganira abanyarwanda!

    Biratangaje kubona Kagame azenguruka Isi ariko atanga ibiganiro,ariko yakira abanyamakuru banyuranye ariko nkaba ntarumva umubaza ikibazo cya ziriya ndege kigiye kunangura \iriya ntagondwa yiyita Ngarambe

  3. Imaniriho whom says:

    ibi ntibyigeze bibaho,kurya wenyine munzu yawe ukibagirwa ko hari n’abandi bashonje!!!!!!!!!!!imana izabimubaza ibi byose akora,kuko abikorera abanyarwanda bafite ubwenge,nuko natubibyemo ubwobo,kandi bamwe tukaba tugikeneye kubahoo,GUSA IREBERA IMBWA NTIHUMYA!!!!!!!!!!

  4. Kagame agiye kuvaho vuba says:
  5. jonas says:

    mushayidi yihangane,hariho Ica imanza zitabera,Idakenera ko habaho ibimenyetso,procureur,substitut cyangwa abacamanza na ba surveillants .Iyo Ibikora mu buhanga bwayo kandi neza.Deo,TUZA.igihe n’icyacyo.ntiwavuye mu ishyamba se,ibuka rero ukomere!

Speak Your Mind

*