U Rwanda Ruzubakwa n'Amaboko y'Abana Barwo Bose

TIG yunguye igihugu akayabo ka miliyari 40

Abashyizeho TIG ni nabo bayirata. Abayikora bo bapfanye agahiri n’agahinda. Iyo bahigimye biba bigaragaza ko bishimiye ibyo bagejejeho igihugu.

Urwego rw’igihugu rushinzwe imfungwa n’abagororwa (RSC) ruratangaza ko imirimo nsimburagifungo (TIG) yunguye Igihugu akayabo ka miliyari 40.

Imirimo nsimburagifungo ikorwa n’abahamwe n’icyaha cya jenoside yakorewe Abatutsi bari mu cyiciro cya kabiri n’icya gatatu. Bakora imirimo yo guconga amabuye yifashishwa mu kubaka imihanda, bubaka inzu , ibyumba by’amashuri, n’inzu z’abatishoboye barimo abarokotse jenoside yakorewe Abatutsi mu 1994.

TIG nka bumwe mu buryo bw’Ubumwe n’ubwiyunge nyuma ya jenoside yakorewe Abatutsi mu 1994, abarenga 52,793 bakoreye igihugu imirimo y’amaboko yo guconga amabuye ifite agaciro ka miliyari 20 mu kubaka imihanda mu gihugu hose.

Uturere tugaragaza ko TIG yagiye ituma ibikorwa byari gutwara amafaranga menshi agabanuka.

Justus Kangwage, Umuyobozi w’Akarere ka Rurindo, yatangarije The New Times ko abakora TIG bubatse imihanda iri ku burebure bwa kirometero 300, hubakwa ikiraro cyatwaye miliyoni 30 mu gihe cyari gutwara angana na miliyoni 50, banubaka icumbi ry’abanyeshuri ku ishuri rikuru rya Tumba ifite agaciro ka miliyoni 20, aho kuba miliyoni 70.

Imirimo nsimburagifungo ikorwa n’abagororwa yinjiriza amafaranga menshi RSC biturutse ku mirimo yakozwe mu masezerano RSC igirana n’Uturere. Ibi RSC ivuga ko bituma ingengo y’imari yagomba kugenerwa na Leta igabanuka.

Usibye kubaka imihanda, abakora TIG bubatse amaterasi angana na hegitari 7,000, hubakwa n’inzu z’abatishoboye ; Raporo ya RSC igaragaza ko abakora TIG bubatse inzu 4,000 zubakirwa ahanini abtishoboye barokotse Jenoside yakorewe Abatutsi.

Abakora TIG banubatse ibyumba by’amashuri 743 bigenewe gahunda y’Uburezi bw’ibanze bw’imyaka icyenda.

Nk’uburyo bw’Ubumwe n’Ubwiyunge, abakora TIG n’abarokotse Jenoside bagaragaza ko TIG yatanze umusaruro. Abavuga ko TIG ari uburetwa nk’ubwahozeho ni abatazi icyo bavuga.

Hamwe mu hari abakora TIG mu karere ka Kicukiro, mu kagari ka Gahanga ahari kubakwa inzu zigera kuri 200 z’ abarokotse Jenoside batishoboye n’abandi, bagaragarije The New Times intambwe TIG yafashije gahunda y’ubumwe n’ubwiyunge.

Veneranda Kabagwira, umwe mu bakora TIG kuva mu 2007, usigaje umwaka umwe ngo ayirangize yagize ati “ Mbere bigitangira byarankomereye. Natekerezaga ku bana banjye uko bazabaho mu gihe ndi muri TIG. Nyuma naje kumenyera kandi nanahigiye byinshi.”

Kabagwira avuga ko yishimiye kubona abaturanyi be barimo n’abo yahemukiye muri Jenoside bita ku bana be, bikamubera nk’ikimenyetso cy’ubumwe n’ubwiyunge.

Floride Mukarukwaya, we warokotse Jenoside, abana be babiri barishwe, ati “ Ntacyo napfa n’abakora TIG Imana yanyomoye ibikomere natewe na Jenoside. Iyo bari hano, Turasangira.” Akomeza agira ati “ Ntekereza ko TIG ari igisubizo. Aba bantu nibo badusenyeye inzu, none bari kuyubaka.” Ayo magambo agaragaza ko ubwiyunge bwagezweho koko kandi ko n’ubumwe buzagerwaho nta shiti.

RSC itangaza ko TIG yanatumye hagabanuka ubucucike bwari mu magereza hirya no hino mu gihugu ku kigereranyo cya 53,3%.

 

Source: Igihe

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Speak Your Mind

*