Rubavu: Impanuka y’ubwato bwavanaga abantu ku kirwa Iwawa yahitanye batanu
U Rwanda Ruzubakwa n'Amaboko y'Abana Barwo Bose

Rubavu: Impanuka y’ubwato bwavanaga abantu ku kirwa Iwawa yahitanye batanu

Ku mugoroba wo kuwa gatatu tariki ya 18 Gicurasi 2011, mu kiyaga cya Kivu habereye impanuka y’ubwato bubiri bwagonganye, abantu batanu bahasiga ubuzima. Ubwato bwa Rwanda Revenue Authority (RRA) bwari butwawe na Marine bwagonganye n’ubwato bw’ababyeyi n’abavandimwe b’abana bari barangije amasomo ku kirwa Iwawa, abantu 3 bahise bitaba Imana, abandi 2 bagwa kwa muganga, kugeza iyi nkuru itangazwa umwana umwe yaburiwe irengero.

Ikarita igaragaza ahabereye impanuka (Ishimwe Rodrigue)

Iyi mpanuka rero yagwiriye abantu bavaga mu birori byo gusoza icyiciro cya mbere cy’amasomo y’abana bavanywe mu buzererezi bakajyanwa mu kigo ngororamuco no guteza imbere imyuga cya Iwawa.
Ubwato bumwe bwavanagayo abantu bubajyana i Rubavu, ubundi bwari busubiyeyo kuzana abandi.

Mu mazina y’abahitanwe n’iyo mpanuka harimo Mfitumukiza Olivier w’imyaka 22 uvuka Nyabihu, Irankunda Kwizera Bruno w’imyaka 2 w’i Gasabo, Muligande Frederic w’imyaka 26 wa Kicukiro, Uwizeye Marius wo muri Rubavu hamwe n’umugore we Nyiraneza Drotte, hakaba habuze umwana wa Nyiraneza na Uwizeye witwa Rafiti Hakuzimana  w’umwaka 1 n’amezi 7.

Ubwato bwavaga Iwawa bwari butwaye abantu 42, harokoka 37, umunani mu barokotse bari gukurikiranirwa mu bitaro bya Gisenyi ku bw’ibibazo bidakanganye batewe n’iyo mpanuka. Uburyo bamerewe buratanga icyizere ko ntawe uri burembe ngo abe yakurizamo gupfa.

Umuvugizi wa Polisi y’u Rwanda avuga ko iperereza ryatangiye, ngo hamenyekane impamvu nyirizina yateye iyi mpanuka, kuko ibikekwa by’uko bumwe mu bwato butagaragaraga, cyangwa se izindi mpamvu zinyuranye zagiye zivugwa, ntibiremezwa.

Abagiriye ibyago muri iyo mpanuka tubifurije kwihangana.

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Speak Your Mind

*