Nyuma y’amatora y’umukuru w’igihugu mu Rwanda, dukomeze umurego mu kurwanya ingoma y’igitugu
U Rwanda Ruzubakwa n'Amaboko y'Abana Barwo Bose

Nyuma y’amatora y’umukuru w’igihugu mu Rwanda, dukomeze umurego mu kurwanya ingoma y’igitugu

par Faustin Twagiramungu.

Faustin Twagiramungu

Faustin Twagiramungu ati:
Dukomeze umurego kugira ngo dutsinde ingoma y’igitugu ya Paul Kagame

Amatora y’umukuru w’igihugu yararangiye, ariko politike y’abashaka ko ibintu bihinduka mu Rwanda iracyakomeza. Twese abashaka ubwigenge ku giti cy’umuntu, abashaka umubano mu bana b’u Rwanda dukomeje umurego kugira ngo ingoma y’igitugu ya Perezida Pawulo Kagame yiyemeje kuyobora u Rwanda, nka “company (sosiyete) y’urugo rwe”, ikabikora ishingiye ku kinyoma, uburiganya, ubwirasi, ubwibone, n’ubwicanyi, tuyirwanye nta mususu kugeza tuyitsinze.

Muri aya matora y’umukuru w’igihugu arangiye, umukandida Paul Kagame yakomeje kuvuga ko yatanzwe n’umuryango FPR, imwe ya Fred Rwigema Gisa.
Nyamara byagaragaye ko iyo FPR ya Rwigema yashyizwe iruhande kera. Byaragaragaye ko umukandida Pawulo Kagame yitoresheje ku bw’igitugu, agatorwa n’Intore asigaye ahamirazanya nazo, agatorwa mw’ifindafinda, n’iterabwoba (intimidation) ridasanzwe, kandi byose bigakorwa ku ngufu za gisirikare na ya komisiyo y’amatora yagizwe uruganda rw’ikoranabuhanga mu bujura bwo kwiba no gutenga amajwi agenerwa Pawulo Kagame ubugira kabiri.
Nyamara ariko turambiwe kubwirwa ngo yatowe 100%, turambiwe 95%, turambiwe 93%. Ubu buryo bugomba kuvaho.
Indi myaka irindwi (7) yo gukomeza gucurwa bufuni, gucundwa ayikoba, no kwemera ko Perezida adusya cyangwa atwica, ni myinshi cyane.

Amatora y’umukuru w’igihugu arangiye tumenye ko umukandida wa FPR, imwe itakiri iy’Izamarere, ubu yabaye FPR-Intore, ikaba na “mpatse-amashyaka”. Bityo, ibyahoze ari amashyaka PSD, PL, ubu yabaye PSD-Iboshywe na PL-Iboshywe, yombi akaba yarahindutse ibikoresho byo gutanga umuganda wo kwiba amajwi, akaba yaremeye no kuba ibikangisho byo gushimangira ingirwa demokorasi,  imwe Perezida Kagame avuga atera urwenya (muri Financial Times yo kuwa 19 Kanama, 2010), ko ari yo demokarasi ibereye ibindi bihugu by’Afurika byose!!

Amatora y’umukuru w’igihugu arangiye tumenye ko kwiga bitabuza bamwe mu bize kuba “inkangara z’ubujiji”. Dr. Ntawukuriryayo wa PSD-Iboshywe, Higiro Prosper wa PL-Iboshywe, na Mme Mukabaramba wa PPC-Itabaho (baringa), batatiye igihango cy’ aba “salus populi”, bemera guca bugufi barahakwa, bamamaza uwo bari bahanganye na we aho kwiyamamaza. Kwiga ntibivura guhemuka, kuri bamwe bisa nk’aho ari bwo buryo bubereye imibereho yabo. Mpemuke ndamuke ubu na yo ni politike ikorwa na ba “Sinangumugayo”.

Amatora y’umukuru w’igihugu arangiye tumenye ko Intore za Boniface Rucagu wahoze ari Interahamwe kabuhariwe ya MRND, akaba yari n’umutoza wa zo, uyu Rucagu hamwe n’inkomamashyi, n’inkundarubyino z’urubyiruko rwahinduwe ibigega by’ubwoba, nibo badukanye icengeza-matwara rishingiye kuburyo bushya bwo kogeza “ingengabitekerezo” y’ishyaka rimwe rukumbi  rya FPR-Intore rya Perezida Kagame. Ntitwabura kuvuga, ariko dufite ikiniga, ko ibyakagombye kuba politike ubu byahindutse ikinamico, nk’aho ibitambo twatanze byari ibyo kugira ngo dusubire mu icuraburindi ry’ishyaka rimwe, no kwimika ubutegetsi bw’igitugu, burusha ubukana ubwavuyeho.

Aya matora y’umukuru w’igihugu ashize adusigiye urwibutso rw’ibibi gusa, harimo cyane ubwicanyi bw’abatavugaga rumwe n’umukandida wa FPR-Intore. Uyu mukandida yananiwe kunamura icumu, yiyamamaza ari nako yica; bityo yicisha uwari wungirije umukuru w’ishyaka rya Democratic Green Party, ari we Andreya Kagwa Rwisereka, yicisha umunyamakuru, Jean-Leonard Rugambage, abato bitaga Sherifu, afata umugambi mubisha wo kwica General Faustin Kayumba Nyamwasa, umugambi arawuzuza, aramurasa ariko ntiyamwica, Iyakare ikinga akaboko. Umukandida wa FPR-Intore yiyamamaje avuga ko ubundi ngo iyo arashe adahusha. Ariko arabeshya. Yarashe Seth Sendashonga ntiyamuhamya neza, ubwa kabiri amucura inkumbi. Na General Faustin Kayumba Nyamwasa yaramuhushije, keretse niba umuvandimwe we Colonel Rugigana Ngabo wafunzwe ku maherere agiye kuzamubera igitambo.

Aya matora ashize yabyaye amahano kuri benshi. Dore abatishwe, bari mu gihugu, ubu bari ku ngoyi. Barazira ko banze gushyigikira politiki y’ikinyoma n’iterabwoba. Banze kuba ibigega by’ubwoba, amaganya, akababaro, no kuba ibiragi mu gihugu cyabo, bityo bavuga iribari ku mutima. Abari kw’isonga banze kuba ingaruzwa-muheto, bakiyemeza kujya mu ntambara y’UKULI ni Madame Victoire Ingabire Umuhoza wa FDU-Inkingi, Me Bernard Ntaganda wa PS-Imberakuri n’abamwungirije, Deograsiyasi Mushayidi, tutaretse na Frank Habineza wa Democratic Green Party, wahizwe bukware. Ubu turasaba ko yahabwa mahoro, kandi abanyamashyaka bafunze tumaze kuvuga, bose bagafungurwa nta mananiza, bityo bagakomeza politike mu gihugu cyabo.

Guhagarika jenoside, iterambere, “accountability”, “good governance”, ibyo nibyo byabaye urwitwazo rwo kugundira ubutegetsi, igikangisho n’intero ya politike y’umukandida watorewe kongera kuyobora u Rwanda. Ayo magambo anogera amatwi y’Abazungu, twebwe si yo dukeneye. Abenegihugu dushaka “freedom”(ubwisanzure) mbere ya byose.

Aya matora n’uburyo yateguwe byatweretse ko politike ya Kagame ari politike y’ubwirasi, y’ubwibone, y’ubushizibwisoni, y’ikinyabupfura gike cyane, ku buryo ibi bitigeze bibaho, haba ku ngoma ya Cyami, n’iya Repubulika kugeza Kagame afashe ubutegetsi muri 1994. Perezida Kagame yibonye mo igisa n’Umukiza. Yabaye nk’Ikigirwamana mu Rwanda, yiha gukora politike ya “nijye jyenyine”. Nyamara arabeshya, Urwatubyaye si urwe gusa, ni urwa Benekanyarwanda twese.

Kuva u Rwanda rwitwa u Rwanda nta Mukuru w’Igihugu wigeze atukana ku mugaragaro, yaba Umwami, cyangwa Perezida. Nta mukuru w’igihugu wigeze yigamba ko yishe abo yarashinzwe kuyobora. Nta mukuru w’igihugu wandagaza abo yasangiye nabo amagambo, n’amabanga y’igihugu, abo bacanye kunda ( bakagira igihango), ngo abatuke, abite “imyanda bituma” cyangwa “imbwa zimoka” we ngo akikomereza urugendo rw’Iterambere.

Isomo rikomeye dusigiwe n’aya matora ni uko ibintu bigomba guhinduka mu Rwanda, maze “ibyari inzozi” z’imibereho ya buri wese zigashyirwa mu bikorwa.

Bikorewe i Bruxelles, kuri 24 Kanama 2010

Faustin Twagiramungu
Uwahoze ari PM w’u Rwanda

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Comments

  1. fidel says:

    Ariko koko wowe Twagiramungu,ongera urunguruke mu kinyamakuru ISIBO yo muri 1992 ureba amagambo wavugaga ugambanira igihugu ugiha FPR bikanakuviramo ku gitegeka(PM)Niko se Rukoko!!ko umaze guhindura FPR Inkotanyi ukayita FPR Intore,ukongera ngo FPR Inkotanyi yari iya Rwigema,birya byose wakoraga wari utaramenyako Rwigema yapfuye agasimburwa na Kagame ariwe wakugize PM w’u Rwanda?

    Rukokoma ko uwagukulikirana yagukuramo ijambo!Ko biriya byose ushinja mucuti wawe(Kagame)iyo umuntu aguhereye mu mizi yasanga byose mwarabikoranye/mwarabifatanije?
    ESE KUKI WOWE ATAKWISHE WAMUHAYE IKI?

  2. gahutu ka kanyarda ka gihanga says:

    kabisa ntamuntu numwe ukwiye guha amatwi rukokoma kuko niwe watanze igihugu agiha fpr none abana ba sebahinzi atumye duhera ishyanga. amenyeko nidusubira mugihugu atazadukurikira iyo nyenzi gusa. mureke turwanye igitugu ariko twirinde ibirumirahabili nka rukokoma. vive bikindi n’inganzo ye, vive le rwanda et le rwandais.

  3. Josephine says:

    Hey…. Ubu se koko hari umuntu ugitekereza gutyo??? Mwambabariye koko mukareka amacakubiri? Abatutsi bazahoraho, abahutu bazahoraho, abatwa bazahoraho…. iyo cercle vicieux yo kwitana abagome, inyenzi?? Muzageza ryali?
    @Twagiramungu: Ku Banyarwanda 11 millions hamaze gupfa bangahe batashyigikiye Kagame? Uravugira muri America urya ukaryama uzi ibibera hano mu giturage?
    @Gahutu: Ndumva genocide utarayirangiza… Courage ariko nakugira inama yo guhindura ibitekerezo, igihe Imana izaca urubanza nta excuse uzaba ufite yo kwanga “abatutsi” cg abo wise “ibirumirahabiri”…. Niba ukunda u Rwanda ba umunyakuri ntiwitwikirize amoko… kuko uri umunyarwanda ….. Harageze guhindura our minds.

  4. RWEGO says:

    Sha Rukoko Kagame jye mbona ali umutagatifu,Wowe ushatse wasanga shitani kuko aliwe mwahanye igihango akanakubatiza ,jye nkuziho byinshi uzabikenera azashyire ho number ye ya phone nzamugusobanurire neza bihagije kuburyo burambuye;Nyakwubahwa PEREZIDA nkwifurije akazi keza naho Rukokoma ntazaguteshe igihe tuzi uwo ariwe n’ibyo agamije;ibyo barukoze mo birahagije turiteguye kugufasha kubirwanya kandi tuzabitsinda,ni byinshi ntawabiva mo!!!!!?????……………………………

  5. Noside-man says:

    ariko se mwa bantu mwe ko ibintu by’amoko byacitse mu Rwanda mwarangiza mukavuga ngo anahutu ,abatutsi,abatwa! mwumva koko muri mu kuri? cg ni ukubeshya mukorere mu kuri twese turi abanyarwanda naho ibyo ngo gahutu ,…,… kabisa ntaho mwazagera tu!

Speak Your Mind

*