U Rwanda Ruzubakwa n'Amaboko y'Abana Barwo Bose

Kapiteni Karuta wahoze mu ngabo za FDLR yemeye ibyaha, akazakoreshwa mu gushinja Victoire Ingabire

Kigali – Kapiteni Jean Marie Vianney Karuta wahoze mu ngabo za FDLR yashyikirijwe urukiko rwisumbuye rwa Gasabo kuri uyu wa kane, amenyeshwa ibyaha aregwa.
Ubushinjacyaha buramushinja kuba mu mutwe w’iterabwoba no guhungabanya umutekano w’Igihugu.

Kapiteni Karuta ni uwa gatatu mu basirikari bahoze mu ngabo za FDLR bashyikirijwe urukiko muri iyi minsi kugirango bashobore kuzemeza ko bakoranaga na Victoire Ingabire mu gucura umugambi wo guhungabanya umutekano w’igihugu no gushyiraho umutwe mushya w’iterabwoba.
Ibyo byaha abifatanyije na Lt.Col. Tharcisse Nditurende na Lt.Col. Noel Habiyambere baherutse nabo gushyikirizwa urukiko rwisumbuye rwa Gasabo, ubu bakaba bafunzwe by’agateganyo mu gihe ubushinjacyaha bugishakisha ibindi bimenyetso.

Kimwe n’abo bandi babiri, Kapiteni Karuta yemeye ibyaha byose aregwa n’ubushinjacyaha. Yemera ko yari mu gisirikare cya FDLR akaba yaroherejwe i Kinshasa kubonana n’abayobozi bakuru ba FDU-Inkingi Victoire Ingabire Umuhoza na Jean Baptiste Mberabahizi.Yemera ko ngo baganiriye uburyo bashinga ingabo za FDU/CDF.

Ubushinjacyaha bwamusabiye kuba afunzwe by’agateganyo butinya ko yatoroka agasubira muri Kongo. Uwunganira Kapiteni Karuta yasabye urukiko ko uwo yunganira yarekurwa akaburana ari hanze, abwira urukiko ko Karuta adashobora gutoroka nk’uko bivugwa n’ubushinjacyaha kubera ko yemera ibyaha, akaba yaratashye mu Rwanda ku bwende bwe we n’umuryango we kandi akaba adateganya kwongera guhunga igihugu cye kandi akaba yubatse neza I Nyamasheke (Intara y’Iburengerazuba).

Urubanza rwasubitswe. Icyemezo kirebana n’ifungurwa ry’agateganyo cyizafatwa kuwa mbere utaha.

– Niba ushaka kwohererezwa emails z’ibyandikwa kuri Rwandinfo mu Kinyarwanda, kanda hano.
– Niba ushaka kujya usomera inyandiko zo kuri Rwandinfo mu Kinyarwanda ukoresheje RSS Reader yawe, kanda hano.

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Speak Your Mind

*