U Rwanda Ruzubakwa n'Amaboko y'Abana Barwo Bose

Human Rights Watch iraregwa gusuzugura ubutegetsi bw’u Rwanda

Kenneth Roth, Umuyobozi wa Human Rights Watch

Kenneth Roth, Umuyobozi wa Human Rights Watch

Kigali – Mu kiganiro Madamu Louise Mushikiwabo, Minisitiri w’Ububanyi n’Amahanga akaba n’Umuvugizi wa Guverinoma, yagiranye n’abanyamakuru kuwa kane, yavuze ku ngingo zitandukanye zirimo ikibazo cy’iburanishwa rya Victoire Ingabire, ifungwa ry’ibinyamakuru Umuvugizi n’Umuseso ndetse n’iyirukanwa ry’umukozi wa Human Rights Watch.

Kuri iyi ngingo ikaba ari nayo yibanzweho, Ministri Mushikiwabo yatangaje ko ibaruwa Umuyobozi Mukuru wa Human Rights Watch, Kenneth Roth, yandikiye Umukuru w’Igihugu imusaba gukemura ikibazo cy’umukozi wabo wimwe viza yerekana agasuzuguro kuri Perezida wa Repubulika ndetse n’inzego z’ubutegetsi z’u Rwanda muri rusange.

Mu mpera z’icyumweru gishize, Ibiro Bikuru Bishinzwe Abinjira n’Abasohoka byamenyesheje Umwongereza Carina Tertsakian, wari wagizwe Umuyobozi wa Human Rights Watch mu Rwanda, ko agomba guhita ava mu gihugu nyuma y’aho viza yari afite irangiriye, kandi akaba yarangiwe indi viza.

Impamvu yatanzwe na Leta y’u Rwanda ngo ni uko impapuro ze z’ubusabe bw’indi viza zari zuzuje nabi.
Umuyobozi Mukuru w’Abinjira n’Abasohoka, Kalibata Anaclet, yavuze ko umukono w’Ukuriye Human Rights Watch muri Afurika uri kuri kontaro ya Carina utandukanye n’umukono uri kw’ibaruwa yo gusaba viza kandi kw’ibaruwa zombi bivugwa ko zashyizweho umukono n’umuntu umwe. Iyo rero akaba ari impamvu ihagije yo kwimwa viza.

Ikindi kandi ngo kontaro ye y’akazi ifite amakosa ku itariki yatangiweho.

Minisitiri Mushikiwabo yatangaje ko atumva neza ukuntu umuntu nka Kenneth Roth w’umunyamerika uzi neza imikorere y’inzego zishinzwe abinjira n’abasohoka mu gihugu cye yakwihandagaza akandikira Perezida wa Repubulika yirengagije amakosa yuzuye mu mpapuro z’ubusabe bwa viza y’umukozi w’uwo muryango. Ikindi kandi u Rwanda ntirwishimiye uburyo Human Rights Watch iruvuga nabi muri za raporo zayo.

Ku kibazo cy’ifungwa ry’ibinyamakuru Umuseso n’Umuvugizi, Mushikiwabo yatangaje ko ibi byicaga nkana amategeko agenga igihugu kandi ko byanatezaga umutekano mucye. Yavuze ko ifungwa ryabyo ryateye agahenge.

Ku birebana n’ukugezwa imbere y’Ubutabera kwa Victoire Ingabire, Mushikiwabo yatangaje ko uyu aregwa ibyaha bikomeye birimo gukorana na FDLR no kuyitera inkunga, Ingengabiterezo ya Jenoside n’ibindi byaha bikomeye birimo kubakangurira kuza mu Rwanda ngo abe ariho barwanira.

Umushinjacyaha Mukuru, Martin Ngoga, abajijwe impamvu umuntu uregwa ibyaha bikomeye yakwemererwa kuburana ari hanze, yatangaje ko iki ari icyemezo cy’Urukiko kitanyuze Ubushinjacyaha. Yemeza ko Ubushinjacyaha bwiteguye urubanza kuko bufite ibimenyetso simusiga bimushinja.

Human Rights Watch ikomeza kwamagana uburyo Guverinoma y’u Rwanda itubahiriza uburenganzira bw’ikiremwa-muntu, ikaba iterwa impungenge cyane n’uburyo Leta icecekesha ikanakandamiza umuntu wese cyangwa umuryango wose ufite ibitekerezo bitandukanye n’iby’abafite ubutegetsi ubu.

– Niba ushaka kwohererezwa emails z’ibyandikwa kuri Rwandinfo mu Kinyarwanda, kanda hano.
– Niba ushaka kujya usomera inyandiko zo kuri Rwandinfo mu Kinyarwanda ukoresheje RSS Reader yawe, kanda hano.

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Speak Your Mind

*