Guverinoma ya Espagne irasaba Afurika y’Epfo koherezayo Kayumba Nyamwasa ushinjwa ubwicanyi ndengakamere n’itsembabwoko
U Rwanda Ruzubakwa n'Amaboko y'Abana Barwo Bose

Guverinoma ya Espagne irasaba Afurika y’Epfo koherezayo Kayumba Nyamwasa ushinjwa ubwicanyi ndengakamere n’itsembabwoko

Fugitive Gen Kayumba Nyamwasa, accused of crimes against humanity and genocide

Minisitiri w’ubutabera wa Espagne yatangaje ku wa gatanu ko Espagne yasabye Afurika y’Epfo kohereza Lt Gen Kayumba Nyamwasa i Madrid kugirango aburanishwe ku byaha aregwa bikubiye mu idosiye umucamanza Fernando Andreu Merelles yasohoye mu mwaka wa 2008, aho yaregaga abasirikare bakuru 40 b’u Rwanda ibyaha by’iterabwoba n’ubwicanyi.

Mu byaha Nyamwasa ashinjwa harimo gutegura no gukora ibikorwa by’iterabwoba, ibikorwa byo guhohotera no kwica abasivili, izimira ry’abantu n’ibyaha bihanwa n’amategeko mpuzamahanga. Arashinjwa kandi kuba yaragize uruhare mu iyicwa ry’abesipanyolo bane mu Rwanda.

Twabibutsa ko Gen Nyamwasa yahungiye muri Afurika y’epfo muri Gashyantare uyu mwaka. Mu kwezi kwa Kamena yaje kurasirwa imbere y’iwe i Johannesburg, mu gihe Afurika y’epfo yakiraga igikombe cy’isi, Leta y’u Rwanda itungwa agatoki kuba ariyo yateguye iyicwa rye. Ubu abashinjwa kuba baragize uruhare muri icyo gikorwa bakaba baracyabunishwa ariko hagati aho Afurika y’Epfo yavanye Ambasaderi wayo mu Rwanda.

Uretse Espagne, hari n’u Bufransa nabwo bwifuje mu myaka ishize kuburanisha abayobozi bakuru z’ingabo z’u Rwanda kubera ibyaha ndengakamere bashinjwa n’umucamanza Jean Louis Bruguiere, ndetse hakaba n’icyegeranyo cya ONU kizasohoka ku tariki ya 1 Ukwakira kirega ingabo za Kagame kuba zarakoze jenoside y’abahutu muri Congo.

Birumvikana rero ko, n’ubwo mu magambo Generali Kagame akomeza kwikomeza no kwihagararaho, afite ubwoba budasanzwe kubera ko Nyamwasa aramutse aburanishijwe mu nkiko zo hanze ashobora gusohora amabanga menshi arebana n’ibyaha byakozwe n’ingabo z’u Rwanda kuva muri 1990 kugeza ubu.

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Speak Your Mind

*