U Rwanda Ruzubakwa n'Amaboko y'Abana Barwo Bose

Bwana Deogratias Mushayidi arasobanura impamvu zo kwibuka uwa 6 Mata

Par Deogratias Mushayidi.

KUKI NAGIYE KWIBUKA UWA 06 MATA?

Mushayidi Deogratias

Deogratias Mushayidi

Kubera ko nzirikana ukuntu itariki ya 06 mata 1994 idateze kuzibagirana bibaho mu mateka ya politiki y’u Rwanda ;

Kubera ko nemera ndashidikanya ko igikorwa cy’ububisha cyo kuwa 06/04/1994, mu guhitana ba Perezida Yuvenali Habyarimana w’u Rwanda na mugenzi we w’u Burundi Sipiriyani Ntaryamira kitaretse n’abandi bose bari kumwe mu ndege, cyakomye imbarutso y’amahano yateje impinduka mu buzima bwanjye bwite no mu bw’abandi bantu benshi babarirwa mu ma miliyoni haba mu Rwanda cyangwa mu karere ndetse no ku isi hose ;

Nubwo namagana bidasubirwaho umugambi wose waba ugamije gusobanura cyangwa koroshya, mu buryo ubwo ari bwo bwose, itsembabatutsi mu Rwanda, « umuti » wari watangajwe, ukamamazwa mu binyamakuru ndetse bamwe mu bategetsi ba Leta bakawogezanya ishema ryinshi bakagera n’aho bawita igikorwa kigaragaza gukunda igihugu ;

Nyamara ndahamya, mu mutimanama wanjye, ko byaba ari ubuhemu n’akarengane, kwirengagiza cyangwa gupfobya, mu buryo ubwo ari bwo bwose, abahutu b’inzirakarengane na bo batikijwe na ya migirigiri y’abicanyi yari ishinzwe « akazi » ko gukiza u Rwanda abanzi n’ibyitso byabo nk’uko bitaga abatutsi muri rusange n’abahutu batavugaga rumwe n’ubutegetsi bw’icyo gihe cyangwa se bafatwaga gutyo.

Ku mugoroba wo kuwa 07 mata 2006 nagiye mu muhango wo kwibuka itsembabatutsi wari wateguwe na Ibuka kuri « Palais de justice » i Buruseli. Nahamaze igice cy’isaha gusa, igihe cyo gutega amatwi abantu babiri bavuze amagambo yarangwaga n’agahinda n’igishyika cyinshi bijyanye n’uwo munsi, hagati y’ama « bougies » menshi cyane y’abarokotse bari baje ari benshi muri uwo muhango nk’uko bisanzwe bigenda buri mwaka kuri iyo tariki n’aho hantu.

Muri icyo gice cy’isaha ariko, nasagariwe n’umukozi wa Ambasade y’u Rwanda mu Bubiligi wagaragazaga ko yarakajwe cyane no kuba kuwa 06/04/2006 nari nagiye mu muhango wabereye mu bwitonzi n’umutuzo, imbere y’urwibutso rwa genocide rwandais rwubatswe muri Komine ya Woluwe Saint-Pierre, wari ugamije kwibuka inzirakarengane zose zatikijwe kuva kuwa 06/04/1994 ukaba wari wateguwe n’abanyarwanda biganjemo abahutu bibumbiye mu mashyirahamwe COSAR na CLIR.

Maze nyakunsagarira wavuganaga umujinya mwinshi ati : « Ni gute ushobora gutinyuka ukaza hano kwibuka genocide y’abatutsi n’ukuntu ejo wari wagiye Woluwe Saint-Pierre kwifatanya n’abahutu ? Nuko umunyamakuru w’inshuti yanjye twari kumwe aba atwitambitse hagati adusaba kugabanya amashagaga. Ariko nari narangije gusubiza nyakumbaza mwereka ko i Kigali ibintu nk’ibyo bikorwa nta kibazo kihabaye. Nti « Ese ubu muzigaragambya murwanye ukuntu Kagame, Rucagu, Bazivamo, Mukezamfura, Gatsinzi(nashoboraga no kongeraho abandi), nyuma yo gusangira ibigori, bajyana kwibuka genocide yo muri 1994 ? ». Nta gisubizo nabonye ku kibazo cyanjye. Twatandukanye rero ari ubusa ku busa !

Rubanda yakugirira ikihe cyizere mu gihe wemeza ko uharanira ubwiyunge mu banyarwanda baba mu Rwanda kandi ukagaruka ugakwiza amazimwe n’amacakubiri mu banyarwanda bo hanze, haba muri Afrika, mu Burayi no muri Amerika ?

Ni ubuhe bufindo FPR yaba ikoresha mu guharanira ubumwe mu gihe igaruka igakoresha ba ambasaderi bayo kubiba amacakubiri ? Yaba se ari ya ntego ya « mbateranye nkunde mbategeke » ? Bibaye ari ibyo, n’abanyarwanda bo hanze bagombye kwisunga ababo bunzi.

Ubu se tugiye guca u Rwanda mo kabiri, igipande cy’abahutu n’ikindi cy’abatutsi hanyuma twubake n’urukuta rw’umutamenwa rutandukanya ibipande byombi kandi bisangiye umurage umwe w’ururimi n’umuco? Ibyo bipande twazajya tumenya tubitandukanya dute ko mu by’ukuri nta bibaho usibye gusa muri bamwe barangwa n’inganzo ntindi kandi zinyuranye?

Iyo tutitwaye nka Gahini, twigana Ponsiyo Pilato!
Imbere y’amahano yadusenyeye igihugu, abanyarwanda bakunze kurangwa no kwigira nyoni nyinshi. Usanga bitworoheye cyane gukoresha amayeri n’uburyarya birangwa no gukina mu bikomeye no kudaha inshingano zacu agaciro zikwiye.

Kubera ko ubutegetsi bwa Yuvenali Habyarimana bwari bushingiye ku gatsiko k’abantu baturukaga mu majyaruguru y’u Rwanda, abakiga bagombye kuba ari bo babazwa iby’amarorerwa yose kandi na none bakaba ari na bo bonyine bahamwa n’ingaruka zayo!

Ibyo ni byo bamwe mu bavandimwe bacu b’abanyarwanda bagerageza gukwiza hose, basa n’abasobanura ko abandi bahutu nta cyo bagombye kubazwa.

Kuba inyeshyamba z’abatutsi zarateye igihugu mu kwakira 1990 kandi bikaba bishoboka cyane ko ari na zo zasohoje umugambi mubisha kuwa 06/04/1994, ni zo zagombye kubazwa ibyakurikiyeho byose! Ibyo bikavugwa n’abandi mu rwego rwo kugerageza gukingira ikibaba za Leta mputu ku ruhare rwazo ruremereye zagize mu mahano yo mu Rwanda.

Kubera ko u Rwanda rwakoronijwe n’Ububiligi n’ubwo bwagiye busimburwa n’Ubufaransa, byose byabazwa abazungu kuko ari bo babikoze! Hakaba rero n’abemeza ko twazize umutego watezwe na ba gashakabuhake b’abongereza bafatanije n’abanyamerika.

Ukurikije ibyo, bose baba ari “abere” bityo rero hakaba hatagombye kubaho umuntu n’umwe ukurikiranwaho icyaha!

Babaye “abere” ba bategetsi bose bo ku nzego z’Igihugu, iza Perefegitura, Komini n’izindi zose kimwe n’abandi nka ba bagabo n’abagore bo mu itangazamakuru batahwemye guhamagarira abaturage “umurimo” babashishikariza ubwicanyi!

Bazabe “abere” ba basirikare n’abajandarume bahisemo gufatanya n’abandi “gukora” aho guhangana n’umwanzi barwanaga!

Bazabe barabaye “abana b’umutima” za nyeshyamba za FPR zahisemo “kusonga mbele” zigamije intsinzi ya gisirikare maze mu irari ryazo rikabije ryo gutegeka, ntizitinye gusuka ibisasu bikomeye ku nkambi zabaga zisendereye ibihumbi n’ibihumbi by’abaturage batagira intwaro!

Mbese ubwo nyirabayazana yaba Umuryango mpuzamahanga dore ko impande zombi nk’uko zari zihanganye zitigeze zihwema na gato kurushanwa amacenga zirwanira icyizere cy’ayo mahanga. Ku isonga rero hakaba “ubutindi” bw’Ubufaransa bwahengereye urugamba rugeze mu mahina kandi genocide iri hafi kurangira bukiha kwiterera mu bitabureba bwitwaje icyiswe “opération Turquoise” yashoboraga kuburizamo, kubangamira cyangwa se igakerereza intsinzi y’inyeshyamba za FPR nk’uko byagenze!

Ni yo mpamvu biteye impungenge ukuntu imbere y’inzirakarengane zitabarika, abagaragaza “kwicuza” imyitwarire yabo muri biriya bihe bakomeje kuba mbarwa. Na none habayeho Kofi Annan wasabye imbabazi mu kimbo cya Loni(ONU), hataho Madeleine Albright na Bill Clinton mu izina rya Leta zunze ubumwe za Amerika, haza ndetse na Louis Michel na Guy Verhofstadt mu izina ry’Ububiligi… Hakaba rero hasigaye bwa Bufaransa “bwirata” nk’uko Kagame yabwiyamye.

Nyamara ariko, kandi jye mbona ari byo byihutirwa, turacyategereje ko za mpande zombi zari zihanganye zakwicuza zigasaba imbabazi. Ku ruhande rw’”abatsinzwe”, Kambanda Yohani wahoze ari Minisitiri w’intebe wa Guverinoma y’abatabazi, akaba yarakatiwe n’urukiko mpuzamahanga ku Rwanda rukorera Arusha muri Tanzaniya, yaba yarigeze “kwicuza” ariko ngo yaje kwisubiraho avuga ko ibyo yari yemeye yari yabihatiwe kandi ngo hakoreshejwe uburyo bunyuranye n’amategeko. Naho ku ruhande rw’”abatsinze”, nta kwicuza na mba FPR n’umukuru wayo Pawulo Kagame bari bagaragaza, dore ko ahubwo bahora bigamba bakivuga imyato ngo bahagaritse genocide. Nyamara washyira mu gaciro, ugasanga bitangaje kandi nta shingiro bifite ahubwo ari agashinyaguro.

Bigombe bimenyekane!
Haba Woluwe Saint-Pierre(06/04/06), haba no kuri Palais de justice(07/04/06), nahabonye abana bafite imyaka nka 12 cyangwa ndetse munsi yayo. Mpabona urubyiruko rw’abasore n’inkumi bari hagati y’imyaka 15 na 25 cyangwa se irengaho. Mu maso yabo harangwaga ubwijime no kudasobanukirwa kandi ukabona basa n’abari hafi kwigaragambya. Narabitegereje bituma nibaza byinshi.

Muri ibi bihe bikomeye turimo, ni uwuhe murage wa politiki tuzasigira urwo rubyiruko rw’ubu n’urw’ejo hazaza ? Mbese ni kuki twakomeza za politiki mbisha zishingiye ku kubiba amacakubiri mu banyarwanda, bamwe ndetse tukabaha akato tugamije kubavutsa amahirwe yo kujya inama n’abandi ngo ejo batavaho bahindura imyumvire yabo ? Mu buryo bunyuranye, n’ubwo rimwe na rimwe hari abatandukira, muri rusange abanyarwanda bo mu ngeri zose bahagurukiye gusaba urubuga rw’ibiganiro byaguye bakunze kwita « rukokoma ». Barabiterwa ahanini no kubura ubwisanzure kubera ukuntu babayeho, n’uburyo bategetswe batagishijwe inama. Barabiterwa no kubura ubuhumekero kubera ukuntu batsikamiwe n’ubutegetsi bw’igitugu bubanigana ijambo bukababuza kwishyira bakizana. Barifuza gusangira ijambo no kujya impaka, bagashaka kumenya no gusobanukirwa amahano bahuye na yo.

Hari inama imwe nifuzaga kugira Perezida wa Repubulika. Ndatekereza ko igihe cyari kigeze ngo afungure amaso n’amatwi maze yiyumvire isahinda ya rubanda. Iyo rubanda yakomeje kugirwa igikoresho, bakayigaraguza agati, ari ko bayitikiza uko bashatse n’igihe bashakiye, none abanyapolitiki badashyira mu gaciro bakaba bayisiganya bitwaje za gacaca, igikoresho cya Leta ya FPR yibwira ko izakomeza, nta shiti, guca imanza zibogamye kandi zibasira uruhande rumwe rw’abanyarwanda. Iyo rubanda yarambiwe agasuzuguro ikaba ishaka kubaho mu mutuzo yishyira ikizana.

Ndagira inama Perezida watinyutse, mu gihe yiyamazaga muri 2003, kugereranya u Rwanda n’inzu yiyubakiye, nkaba namusaba kureba uko yafatamo nibura icyumba kimwe akagiha rubanda kugira ngo abaturage babone urubuga rwo kwicaramo, gucoceramo ibibazo no kubishakira ibisubizo, bityo bafumbire ubwiyunge buhamye kandi burambye nyuma y’amarorerwa yaranze amateka y’igihugu.

Mfatanije na bagenzi banjye muri Partenariat-Intwari, twaharaniye iteka ko ubushyamirane burangwa mu banyarwanda bukaba bwaradukiriye n’abaturanyi nka Kongo bwakemurwa mu nzira z’amahoro. Nubwo nkomeje kwemera inzira z’imishyikirano mu gucyemura amakimbirane, ndifuza kumenyesha Pawulo Kagame ko mu gihe yaba akomeje izima rye rirangwa n’agasuzuguro ndetse no kwirengagiza ibyifuzo bya rubanda, nta kundi byagenda uretse ko aho kumusaba icyumba, iyo rubanda izahagurukira rimwe ikigarurira « inzu » yose.

Kubera ko mu by’ukuri :

Niba guharanira ko ukuri ku ihanurwa ry’indege ryo kuwa 06/04/1994 gushyirwa ahabona;

Niba gutinyuka kwibaza ku mugaragaro abakoze icyo gikorwa cy’ububisha badakwiye guhirahira ngo bibwire ko bashobora kunga abanyarwanda;

Niba kwibuka ubwo bubisha nk’igikorwa cyaroshye igihugu n’akarere kose mu marorerwa atagira urugero;

Niba kwiyumvisha ko kwibuka no guha icyubahiro inzirakarengane z’abatutsi zazize genocide bitagombye kwibagiza abavandimwe babo b’abahutu batikiriye hamwe kimwe n’ibihumbi by’abahutu bazize ubwicanyi butari bwahabwa inyito bwakozwe na FPR;

Niba gushyira mu majwi no gusaba ubutabera ku itikizwa ry’impunzi z’abanyarwanda zabaga muri Kongo barimo abagore n’abana kandi bakaba bari biganje mo abahutu;

Niba guhamya ko impande zinyuranye zagiye zigira uruhare rutandukanye mu mahano yoretse u Rwanda n’akarere;

Niba kubangamira umugambi mubisha wo kurema mu banyarwanda ibipande bibiri bizahora bihanganye ubuziraherezo, maze “ababi” bakaba abahutu naho ”abeza” bakaba abatutsi;

Niba kwerura ukarwanya uwo mupango w’amacakubiri wifuza ko abahutu bemeye kuyoboka FPR bahindurwa “abere” naho abayivuyemo cyangwa abanze kuyiyoboka bagahindurwa “interahamwe” cyangwa se “abajenosideri”(génocidaires);

Niba gufata Géneral Major Pawulo Kagame nk’umunyagitugu ukoresha iterabwoba kandi ucyekwaho ibyaha bikomeye by’intambara;

Niba kwamagana ubutegetsi buriho kubera ko burenganya kandi bugahemuka;

Niba buri muntu wese utinyutse kunenga no kurwanya ubwo buryo bwose budahwitse agomba kuregwa “guhakana”(nier) no “guhindura”(réviser) génocide yo muri 1994, ubwo nanjye nagombye gukurikiranwa kandi mbaye mbyemeye hakiri kare.

Igikorwa cyanjye ndakiyemeje kandi ngituye inzirakarengane zose aho ziva zikagera, zatashye nta rwango nta n’inzigo ku mutima, zikaba zarazize ubugome n’ubwicanyi butagira uko buvugwa bw’abavandimwe babo bari basangiye igihugu. Ubugome n’ubwicanyi byatewe inkunga kandi bikayoborwa n’ingirwa leta kimwe n’impande zombi zarwanaga, buri rwose mu ngamba zarwo rukaba rwaragiye rufata ibyemezo byaje gutuma n’amazi arenga inkombe. Ubugome n’ubwicanyi bwareberewe n’Umuryango mpuzamahanga wahabaye ikigwari none ukaba usa n’ugerageza gutsindira abanyarwanda ubutegetsi bw’igitugu n’iterabwoba by’abatsinze, wiyibagije ko nta masezerano nyakuri yo kurangiza intambara yigeze asinywa hagati y’ibipande byombi by’ingabo.

Icyo gikorwa cyanjye ngituye abanyarwanda bose n’nshuti z’u Rwanda zitarangwaho uburyarya, baharanira ko mu Rwanda rworetswe n’amahano, hagaruka ubuvandimwe hagati y’abarutuye, igihugu kikarangwa n’ubutabera nyabwo no kwihanganirana.

Aha ndashaka kuvuga cyane cyane nka Colonel Luc Marchal(yayoboraga umutwe w’abasirikare b’ababiligi muri Minuar) umaze iminsi atotezwa mu binyamakuru azira ko yagaragaye mu muhango wo kwibuka wabaye kuwa 06/04/2006. Uwo mugabo ari mu bantu bazira ko biyemeje kurwana inkundura bagamije ko ukuri kose kuri genocide yo muri 1994 kwashyirwa ahagaragara. Imana iratube hafi kugira ngo impaka mbirigi ku kibazo cy’u Rwanda zitavaho zituvutsa burundu kumenya ukuri dukeneye.

Icyo gikorwa ngituye za miliyoni z’abanyarwanda n’abanyarwandakazi bakomoka ku mirongoranire hagati y’amoko yombi y’abahutu n’abatutsi, ubu bakaba barabuze amajyo kubera ukuntu ubushyamirane bw’ayo moko busa n’ibisazi bukaba bwaratwokamye ku buryo twahindutse nk’ingwate.

Icyo gikorwa kandi ngituye n’abavandimwe bacu b’abatwa, kuko na bo amahano yo mu Rwanda yabasigiye ibisare nubwo kuba ari bake cyane kandi bakaba batagaragaza kenshi inyota y’ubutegetsi bituma babaho nk’abahawe akato mu gihugu.

Nsabye buri wese n’umutimanama we ngo twirinde gukoresha agahinda n’ibyago by’abavandimwe nk’iturufu ya politiki. Nubwo habaye intambara, itsembabwoko n’andi marorerwa ateye ubwoba yariherekeje, nta kundi byagenda abanyarwanda bagomba kubana bagasangira akabisi n’agahiye. Kabone n’aho bamwe, mu kugerageza kwivana mu mutego w’ayo mahano yose, bagerageza kwitandukanya n’igihugu cyabo bakoresheje uburyo bunyuranye ariko bwose budahwitse.

Hagati aho, ku misozi babaho yo mu Rwanda, abahinzi n’aborozi bo mu gihugu cyacu ntibahwema kuduha isomo ry’ubuzima, rirangwa n’ubutwari, ubwihangane n’urukundo rw’igihugu. Abo bapfakazi n’imfubyi basigaye buri buri ariko bakabona intege zo kujya impaka mu rwego rw’imibereho y’abana babo. Urwo rubyiruko ruzonzwe n’ubushomeri kandi rukaba rutabona neza ejo hazaza uko hazaba hifashe ariko rugakomeza umurego rwizeye ko ibyiza biri imbere. Abo basaza n’abakecuru babaye impabe nyamara mu bwitonzi n’ubushishozi bidasanzwe, bakirinda gusigira abato umurage mubi wo kwiheba mu buzima.

Ariko se byifashe bite mu banyapolitiki b’abanyarwanda cyangwa mu ntiti zacu? Baraduteganyiriza iki mu mashyirahamwe anyuranye bakunze kwita société civile? Ubu se hari uwakwishimira kubona igisirikare, ubutegetsi bwa politiki na za kaminuza byarahindutse nk’ibivunge? Hari uwakwizera amashyaka adashyira mu gaciro ahubwo akaba arushanwa gutera ivi imbere ya Cyama ihatse Leta, iryo bakavuze bakarihakishwa? Tugire dute imbere y’imyitwarire ya bamwe mu batavuga rumwe na Guverinoma ya FPR, ntibagaragaze neza intego bafite, ahubwo bagahora banenganenga baterekana igishya bazanye, ndetse rimwe na rimwe bakanakoresha ibitutsi n’imvugo nyandagazi byibasira bagenzi babo bita “abagambanyi” kurusha abo bagahanganye.

Mu cyubahiro cyinshi, nongeye kunamira inzirakarengane zose zazize amahano yoretse u Rwanda n’akarere. Kandi nsabye abanyarwanda bose dusangiye igihugu ngo bitonde bo kugwa mu mutego w’ubwironde ubwo ari bwo bwose, maze twisanire igihugu tukigaruremo amahoro n’uburumbuke ndetse kizanagire uruhare rugaragara mu kuzahura no guteza Afrika imbere.

Ndifuza ko mu minsi, amezi n’imyaka biri imbere, twazarushaho kwifatanya maze tugaha Icyubahiro gishyitse kandi koko mu rwego rw’igihugu cyose, kijyanye n’agaciro, urukundo n’ishimwe bikwiye inzirakarengane zose.

Déo Mushayidi
08/04/2006

Niba ushaka kwohererezwa emails z'ibyandikwa kuri Rwandinfo mu Kinyarwanda,
Injiza email yawe hano:

Bitangwa na FeedBurner

Speak Your Mind

*